Borgmester Hermann Berthelsen atuartuutilinnut: Internet akeqanngitsoq takkutilerpoq

Atuarfiup avataani qarasaasiaaqqat iPadit atorneqarsinnaalernissaat anguniarlugu Qeqqata Kommunia aningaasaliisimavoq. Atuartut sumiikkaluarunilluunniit internetsimut attaveqalernissaat anguniarneqarpoq. Atuarfiup avataani qarasaasiaaqqat ipadit qaqugu internetsimut attaveqarsinnaalissanersut, angajoqqaat atuartuutillit apersuutigaat.

Qaammatit marluk missaat qaangiuppata qarasaasiaaqqat iPadit atuarfiup avataani internetsimut attaveqarsinnaalissasut, Qeqqata Kommuniani Borgmesteri Hermann Berthelseni neriorsuivoq.

- Tassa massakkut suleqatigut antennilersuipput. Sisimiut, Maniitsoq nunaqarfiillu arfinillit, qaammatit marlussuit ingerlaneranni internetsimut attaveqarsinnaalissapput. Qeqqata Kommuniata iluani sumiikkaluarunilluunniit, atuarfiup avataani internet atorsinnaalertussaavaat. Taamaammat antennilersuisut naammassinissaat tassa utaqqiinnarparput, Qeqqata Kommuniani Borgmesteri, Hermann Berthelsen, oqarpoq.

Qarasaasialerinermik suliffeqarfik Inu:it suleqatigalugu, atuarfiup avataani internetsimut attaveqalernissaq anguniarneqarpoq.

Qarasaasiaaqqat iPadit meeqqat atuarfiani atuartunuinnaq naatsorsuussaapput. Massakkut atuarnerup nalaani iPadit kisimi internetsimut attaveqarsinnaapput. Atuarfiup avataani internetsimut attaveqarsinnaalerpata periarfissat nutaat amerlissasut, Hermann Berthelsenip naatsorsuutigaa.

- Atuarfiup avataani internetsimut attaveqarsinnaalerpata, periarfissat nutaat saqqummertussaasut eqqoriarsinnaavarput. Taanna tunngavigalugu ingerlagatta. Taamaammat atuinissamut periarfissat, antennilersuineq teknikkikkullu iluaqutissat, naammassippata annertoorujussuamik atuisoqalersinnaalissaaq, Hermann Berthelsen oqarpoq.

Qarasaasiaaqqat iPadit atuarfiup avataani internetsimut attaveqarsinnaalerpata angajoqqaat aningaasartuuteqassanngillat. Internetsimik atuineq kommune aqqutigalugu akilerneqartassaaq.

- Pilersaaruterput malillugu angajoqqaat internetsimut akiliisartussanngillat. Kisianni atuinermut tunngasunik maleruagassaqartussaapput. Aatsaavissuaq Kalaallit Nunaanni taamatut misiliinerummat takulaariartigu qanoq ingerlanersoq. Kommunip aqussinnaasaanik ingerlasinnaasariaqarpoq. Naatsorsuutigaarput atuinerup annertunerpaartaa kommuni aqqutigalugu akilerneqartartussaq, Qeqqata Kommuniani Borgmesteri, Hermann Berthelsen, oqarpoq.

Angajoqqaat atuartuutitik iPadinik tunisissimanerat qujamasuutigaat.

Aningaasaateqarfiup Villum-Fondenip 17 millionit koruuninik aningaasaliineratigut, iPadinik agguaasinissaq piviusunngorsinnaasimavoq.

Qarasaasiaaqqat iPadit 3000-tit Qeqqata Kommunianut Kommuni Kujallermullu tunniunneqarput.