Politiit ullormut nalunaarutaat: Biilit orsussamik assartuutit assakarsimasut ullumi qaqinneqassapput

Qaqortumi upalungaarsimasut oqaaseqarneranik nalunaaqutaq 14:30 nutarterpoq.

Qaqortumi politiit qatserisartullu biilinut orsussamik assartuutinut iliveqarfitoqqap eqqaani innaarsukkut assakarsimasunut ualisoq marluk missaanni ornigutilertorput.

Assartuutit taakkua uppillutik innaarsukkut sisoorsimasut, Kalaallit Nunaanni politiit ullaaq manna ilisimatitsipput.

- Biilit orsussamik assartuutit ajutumeerneranni ajoqusertoqanngilaq, assartuutillu ajutumeertut qatserisartut ippassaq imaarpaat uuliakoornatillu, politiit pigaartuisa ningiuat Anette Ostenfeldt oqarpoq.

Assartuutit ajutumeerfiata eqqaa politiit assersorpaat, tassanilu suliassat allat qatserisartunit isumagineqassallutik.

Qaqinneqassasut

Biilit orsussamik assartuutit suli ajutumeerfimmiittut upalungaarsimasunilli ullumi qaqinniarneqassasut, politiit pigaartuisa ningiuat oqarpoq.

- Maannamut suliat iluatsilluarput, Anette Ostenfeldt oqarpoq paasisaqarnerorusukkuttalu qatserisartunik oqaloqateqarnissatsinnik kajumissaarluta.

Ajutumeerfimmi suliassatik ippassaq marlunngornermi isumagereermatikkit biilit ajutumeertut qaqinneqarnissaat piginnittuisa isumagissagaat, qatserisartut ilisimatitsipput.

- Biilit ajutumeertut ullup ingerlanerani qaqinneqassapput, Kommune Kujallermi upalungaarsimasut ittuat Otto Kielsen oqarpoq.

- Imaaliallaannarli qaqinneqarsinnaanngimmata pilersaarusiorluakkamik qaqinneqassapput, taamaaliornissamullu suli piareersaleruttorput, taanna oqarpoq.