Aviisi: Timmisartortartoq periarfeerunneqartoq USA-meersuuvoq

Amerikami najukkami aviisip, The Forum of Fargo, timmisartortartup Islandimi Keflavikimit Kulusummut ullut arfinillit matuma siorna piterartillugu ingerlaatilluni periarfeerunneqartup kiunera saqqummiuppaa.
septembarip 17-at 2014 04:47

Aviisi naapertorlugu amerikamiu 34-nik ukioqartoq Paul Eriksmoen Washingtonip pigisaanit Sheltonimeersoq pineqarpoq, taannalu timmisartumi issimasutuaalluni periarfeerunneqarpoq.
 
Timmisartortartup ataataata, Curtis Eriksmoenip, The Forum of Fargomut oqaatigaa ernini ilaasoqarani angalasoq, timmisartumillu Cessnamik Europamit USA-mut ikaarussisuusoq. Paul Eriksmoen timmisartartutut ilinniagaqarpoq amerikamilu timmisartuliorfinni atorfeqarluni, timmisartunik pisianik nunarsuarmi sumiiffinnut assigiinngitsunut angallassisartuulluni.

AAMMA ATUARUK Ujaasineq: Kiisami allaaqqissivoq

Ataataa oqaluttuarpoq timmisartup nakkarsimaneranik ilaqutariit arfininngormat kalerrinneqartut, tamannalu pivoq ilaqutaasut arlallit Paul Eriksmoen attaveqarfigisinnaajunnaarnerata kingorna.
 
Timmisartup Kulusummut mittussanngortilluni radiokkut attavigineqareerluni periarfeerunneqarneranit ullut arfinillit maanna qaangiussimalerput. Timmisartortartup amerikamiuunera Nunatsinni politiinit aammalu Nunatsinni Islandimilu silaannakkut angallannermut oqartussaasunit suli uppernarsarneqanngilaq.

Ujaasineq silarlunneranik akornusersorneqarpoq
Kingorna timmisartunik qulimiguulinnillu ujaasititsisoqarpoq, ullulli arlallit silarlunnera pissutigalugu ujaasineq ajornakusoorsimalluni.

Timmisartoq Twin Otteri qulimiguulillu Sikorsky, Air Greenlandimeersut,  tunup sineriaata avataani imartami annertuumi Kulusuullu kujataata-kingaatungaani sermersuarmi ippassaq ujaasitinneqarput. Ippassarli ujaasineq aamma angusaqarfiunngilaq.

AAMMA ATUARUK Timmisartuaraq periarfeerunneqartoq suli ujaaraat