Avatangiisinut illersuiniaqatigiiffiit allannguutissamut uparuaapput
Inatsisip allannguuteqarneratigut paasissutissanik takunnissinnaatitaaneq killilerneqassaaq immikkullu naammagittaalliorsinnaanermut periarfissaq atorunnaarsinneqassalluni.
AAMMA ATUARUK: Aalajangiinerit pillugit maalaarsinnaatitaaneq immikkuullarissoq atorunnaassaaq
Avatangiisinik illersuiniaqatigiiffiit sisamat: Avataq, Noah, Det Økologiske Råd aamma nukissiuutit ataavartut atorneqarnissaannik suliniaqatigiiffik, VedvarendeEnergi, Kalaallit Nunaanni uran pillugu oqallinnermi peqataasarput.
AAMMA ATUARUK: Urani pillugu oqallinneq Københavnimi nanginneqassaaq
Taakkua ataatsimoorlutik tusagassiuutinut nalunaaruteqarlutik isornartorsiuteqarput, inatsisip allanngortinneqarneratigut innuttaasut pisinnaatitaafii akornuserneqartut oqarlutik. Aatsitassanut inatsisip allannguutissaa Inatsisartut tulliani ataatsimiinneranni oqaluserineqasaaaq.
- Aalajangerneq taanna akerleriiffiusoq Aarhusimi isumaqatigiissummut, Aarhus konvensionemut, naapertuutinngilaq, isumaqatigiissummi tassani innuttaasut avatangiisit pillugit paasissutissanik pissarsisinnaanerannik periarfissinneqarput aalajangiinissallu sioqqullugit peqataatinneqartarlutik, taamatullu eqqartuussisutigut suliassanngortitsinnaapput naammagittaalliorsinnaatitaalllutillu, avatangiisinik illersuiniaqatigiiffiit taama allapput.
- Uranimut naaggaarluinnarnerup atorunnarsinneqarnera kalaallit danskillu politikeriisa illersorlugu oqarput, Kalallit Nunaanni uranimik piiaaniarnermi avatangiisit illersorneqarnissaannut piumasaqaataasut nunarsuarmi qaffasinnerpaasut.
Aarhusimi isumaqatigiissut Aarhus Konventionen 1998-imi Danmarkimi atsiorneqarpoq, tassani innuttaasut avatangiisit pillugit paasissutissanik pissarsisinnaanerannik aalajanngiinerillu sioqqullugit peqataatinneqarnerannik periarfissinneqarput kiisalu naammagittaallliorsinnaatitaallutik.
Paasissutissanik takunnissinnaatitaanerup killilersorneqarneranut Naalakkersuisut tunngavilersuutaat tassavoq allakkiat paasissutissat suli naammassineqanngitsut - Aatsitassaqarnermut naalakkersuisoqarfiup aamma Avatangiisinut Pinngortitamullu Naalakkersuisoqarfiup akornanni oqaloqatigiissutineqarnissaat pisariaqartinneqarsinnaammat.
Immikkut ittumik naammagittaaliorsinnaanermut periarfissaq atorneqarnikuunngilaq taannalu atorunnaarsinneqarpat Aatsitassanut Naalakkersuisoqarfiup Naalakkersuisoqarfiit assigilissagai, inatsiseqarnermut immikkoortortami chefkonsulenti KNR-imut nassuiaatigisimavaa.