Avaleraasartoorniarneq aallartiinnaqaaq
Akuersissutit sapaatit-akunnerata siuliani tunniunneqarput, aalisariutillu siulliit avaleraasartuunik pisassiissutaasut tonsit 100.000-iusut aalisarlugit maanna aallartereerput.
Tunup imartaani avaleraasartoortassat affaat kalaallit aalisariutaannit aalisarneqassapput
Avaleraasartuunik pisassiissutaasunit tonsit 52.000-it kalaallit aalisariutaannit aalisarneqartussaapput. Aalisarnermut naalakkersuisup Finn Karlsenip tusagassiorfinnut nalunaaruteqarluni erseqqissaatigaa inuttat nunatsinneersut avaleraasartoorniarnermi ilinniartinneqarnissaat assut pingaartillugu.
- Aalisarneq naammassineqariarpat ukiormanna avaleraasartoorniarnerup qanoq ingerlanerata tusarnissaa assut pissanganarpoq, naalakkersuisoq oqarpoq.
Siorna avaleraasartoorniarneq juulip qaammataata qiteqqunnerani annerpaaffimminiippoq.