Tatiginnikuunnaarluni taasititsinermik siunnersuuteqarneq: Atassutip Kim Kielsen tatigiunnaarpaa
20:36 nutarterneqarpoq.
Atassut aalisarnermut naalakkersuisumut Kim Kielsenimut tatiginnikkunnaarlutik taasinissamik siunnersuuteqareersullu, aalisarnermut inatsisissap Inatsisartuni oqaluuserineqarnera unikkallarpoq.
Taamaattumik Kim Kielsen naalakkersuisuuinnassanersoq taasissutigineqaratarsinnaavoq.
Aalisarnermut piniarnermullu naalakkersuisoq aalisarnermut inatsisissap aappassaaneerneqarnerani akissuteqaateqarnermini partiit illuatungiliuttut tikkuarpai eqqunngitsumik avammut paasissutissiinerarlugit, nassuiaasernaguli sooq.
- Naalakkersuisoq erseqqissaanngilaq suna illuatungiliuttut inuiaqatigiinnut puupassaarinertut nipilimmik inatsisissami pisimaneraat.
- Taamaalillunilu avammut inuiaqatigiinnut eqqunngitsumik illuatungiliuttut partiivinut nivinngaalluni.
- Partiit illuatungiliuttut Inatsisartuni ilaasortaatitaqartut inatsisissamut ernummateqarnermik aallaaveqartumik saqqummiussaqarsimanerat pisinnaatitaaffiuvoq naalakkersuisumillu nipangersarneqartussaatitaanani, Atassutip siulittaasua oqarpoq.
Illuatungiliuttut tapersiisut
Atassut Naleqqamit Demokraatinillu taperserneqarpoq, naalakkersuisullu illuatungiliuttut ilumuunngitsumik pasillersimagai aamma taakku isumaqarput.
Naak illuatungiliuttut tamarmik tatiginnikuunnaarlutik taasiniaraluartut, taamattoq Kim Kielsenimut kinguneqarnissaa qularnarpoq.
Naalakkersuisoqatigiimmi IA aamma Siumut Inatsisartuni amerlanerussuteqarluarput.
Amerlanerussutillit Kim Kielsen taperserpaat
Tatiginnikkunnaarnermik taasisitsinermi 19 suli tatiginnillutik taasipput, qulit tatiginnikuunnaartut.
Taamalilluni Kim Kielsen aalisarnermut naalakkersuisuuinnassaaq.
Oqallinnerlu ingerlaqqippoq.
