Atassutip immikkoortortaa: ICC ikilisaavigineqartariaqanngilaq
Kattuffimmi taama pingaaruteqartigisoq ikilisaavigineqartariaqanngitsoq, tusagassiuutinut nalunaaruteqarlutik allapput.
- Nunatsinni aamma naggueqatitta akornanni pissutsit eqqarsaatigissagaanni, issittormiutut inissisimanerput aamma nunap inoqqaavinut tunngassuteqartut eqqarsaatigalugit ICC pisariaqartilluinnarparput, tusagasiuutinut nalunaarummi taama allassimavoq.
Taamaattumik Atassutip immikkoortortaa isumaqarpoq, ICC aqqutigalugu inuttut pisinnaatitaaffivut allarpassuillu Naalagaaffiit Peqatigiit akornanni oqariartuutigineqartarmata sulissutigineqartarmatalu qujasariaqartugut.
ICC-p suliniutigisartagai arlallit Atassut Ilulissanit taakkartorneqarput, ilaatigut nunarsuarmioqatigiit akornanni naggueqatigiit Inuit soqutigisaat pisinnaatitaaffiilu illersussallugit suliniuteqartutut. Naggueqatigiit Inuit kulturiat inooqatigiinnerallu nalerput siunissarlu eqqarsaatigalugit tamakkua tammatsaaliorlugillu siuarsarneqarnissaat pillugit ICC suliniuteqartuuvoq. Issittumi avatangiisinut tunngasunut politikkeqarnissaq ataavartussaq ineriartortissallugu kaammattuutigissallugulu ICC-mit suliniutigineqarpoq.
ICC-p suliniuteqarnera ataqqineqarluni tusarnaarneqartarpoq. Soorlu ICC-p siulittaasua Aqqaluk Lynge, ICC-mi suliniuteqarluarnermi kinguneranik USA-mi Dartmouth College-imi ataqqinaammik doktorinngortinneqartoq.
Taamaattumik ICC-mut tapiissutinik ikilisaaniarnera Atassutip immikkoortortaata isumaqatiginngilaa.
- Atassutip Ilulissani immikkoortortaqarfiata ICC-mut tapiissutinik nungusaaniarneq isumaqatiginngilluinnarpaa. Neriuppugut ICC-p suliniutigisarpassui timitaliinikkut tapersersorlugit tapissuteqartarneq ingerlaannartariaqartoq, ICC-mi anguniagai tapersersornarluinnartuummata aamma issittormiunut iluaqutaammata, partiip immikkoortortaqarfianit taama naggasiipput.
