Assit: Maajip aallaqqaataanni nillertumi seqinnersumilu ingerlaaqatigiinneq

- Tassa kaffisortitsilluta nuannarisarparput. Aamma taamaakkusunnartorujussuussarpoq.

Aaninnguaq Falksen Nuummi ileqqoq malillugu Nuuk Centerip saavanut ippassaq takkuttut ilaat oqarpoq.

Maajip ulluisa aallaqqaataatigaat, Nuummilu pisarnertut NSIP, SIK-lu Nuuk Centerip eqqaanit katersortarfiup tungaanut ingerlaaqatigiinnissamik aaqqissuussipput.

Aaninnguaq Falksen katersortarfiup tungaanut ingerlaaqatigiinnermi. Assi © : Johansinnguaq Olsen / KNR

Aaninnguaq Falksen, soraarninngunngikkallarami Nuummi kolligiartunut ukiut 40 sinnerlugit iggassiuarsimavoq. Taannalu NSIP-mi siulersuisunut aamma ilaasortaasimalluni.

- Pingaartorujussuuvoq pingaartumik sulisarallaratta ingammik, tassa sulisartutut ullorput pingaartittaqaarput, taanna oqarpoq.

Katersortarfimmi oqalugiarnerit aallartinnginnerani kaffeqarlunilu kaageqarpoq. Nalunaaqutaq ataatsimut SIK-p siulittaasua Jess G. Berthelsen oqalugiarpoq:

Ilisseqanngippat nuna manna ingerlanneqarsinnaanngilaq

- Ataqqinartut sulisartut kingumut sulisartut ulluanni pilluangaaritsi! Ilisimassavarsi ilisseqanngippat manna nuna ingerlanneqarsinnaanngimmat!

- Ilissiuvusi ullut tamaasa pisiniarfinni pilersorneqarnissatsinnik isumaginnittuususi. Ilissiuvusi utoqqaat angerlarsimaffiini utoqqartatsinnik isumaginnittut. Ilissiuvusi suliartortilluta meerartatsinnik paaqqinnittarfinni isumaginnittut, siulittaasoq oqaluarnermini aalisarnermut inatsisissamut politikerit maanna oqaluuserileruttugaannut saannginnermini oqarpoq.

Jess G. Berthelsen SIK-mi siulittaasuuvoq. Taanna katersortarfiup tungaanut ingerlaaqataavoq. Assi © : Johansinnguaq Olsen / KNR

- Minnerunngitsumik aalisakkerivinni sulisartut ilissiuvusi aalisartut tulaassuiuarsinnaaniassammata uagullu aningaasarsiaqarsinnaaniassagatta suliartortuartut. Aalisarnermut Inatsisissaq SIK-p pingaarteqaa,

- Taamaattumik aalisarnermut inatsisissap qanoq naammassineqassanersoq SIK-mi assut pissanngatigaarput. Tassami ilaasortatta nunami sulisut inatsisitigut pitsaa­su­mik atugassaqartinneqarnissaat pingaartipparput. Aap, tusaavara oqariartortoqartoq inatsisissaq aalisartunut iluaqutaassasoq. Soorunami aalisartunut iluaqutaasariaqarpoq. Kisianni sulisartummi? Taakkuuppummi aalisartut tulaassuiuarnissaannik qulakkeerisut, SIK-p siulittaasua oqarpoq.

Imaqarniliat tammartut

Aaninnguaq Falksenip siulersuisuni suleqatigisimasani nerrivimmeeqatigaa. Naallu taakku soraarninngoreersimagaluarlutik maajip aallaqqaataani aaqqissuussamut ukiut tamaasa peqataasarput.

Nerrivimmi issiasut kaffisuullutillu kaagisuullutik oqaluttuaqattaarput. Taakkumi siulersuisuni ataatsimiinnermi imaqarniliortarnitik eqqaamavaat – taakkulu imaqarniliat qarasaasiaq atorlugu imaqarniliortarnertik aamma eqqaamavaat.

- Qarasaasiat nutaat atuleqqaarmata imaqarniliorutta imaqarniliorutta toqqorutsigit tammassapput, aamma aallaqqaataaniit.

Assi © : Johansinnguaq Olsen / KNR