Assiliinermik unammisitsisoqalerpoq
Suliniaqatigiiffik CAFF, Conservation of Arctic Flora and Fauna, Issittumi assiliisartunut unammisitsisuuvoq. Unammisitsineq taaguuteqarpoq 'Through the lens' - Assiliiviup igalaasartaatsigut.
Issittumi pinngortitap assigiinngisitaartuunera pillugu Trondheimimi Norgemi ataatsimeersuarnissaq decembarimi pisussaq sioqqullugu unammisitsisoqassaaq. Ataatsimeersuarnermi suliniaqatigiiffiup CAFF-ip Issittumi pinngortitalerinermi misissugai ataatsimiissutigineqassapput.
AAMMA ATUARUK: Kalaallit Nunaanni piujuaannartitsinissaq amigaataavoq
Unammisitsinermi eqqugassat annersaaraat Ilulissanut angalaneq. Assit unammissutigineqartut ilaat immikkut toqqakkat ataatsimeersuarnermi saqqummersinneqassapput.
Assilisat unammissutigineqartussat sisamanut agguarneqarsimapput: nunap isikkua, pinngortitap assigiinngisitaartuunera, inuit, inuussutissarsiorneq aammalu ilisimatusarneq.
Assiliisartut tallimat siornatigut nersornaaserneqarsimasut assilisanik naliliissapput, ilaatigut Nunatsinni assiliisartoq tusaamaneqarluartoq Carsten Egevang nalileeqataassalluni.
Assit kingusinnerpaamik oktobarip tallimaanni nassiunneqarsimassapput. Unammisitsinermut peqataanissamut piumasaqaatit uani takukkit.