Asii Chemnitz Narup: Isumaqatiginninniartoqartuu-saarsimavoq

Kommunit akornanni nalimmaassaasoqarnissaanut aaqqissuusseqqinnerugallartoq aappaagumoortoq, Naalakkersuisut ippassaq aalajangiiffigaat, Kommuneqarfik Sermersoorlu 54 millionit koruuninik Kommune Kujallermut Qaasuitsullu Kommunianut pilliuteqassasoq aalajangerluni.
Allattoq Mads Lynge
aggustip 21-at 2014 06:16

Kommuneqarfik Sermersuup borgmesteria Asii Chemnitz Narup tamanna pillugu ima oqaaseqarpoq:
 
- Kommunalbestyrelsimi juulip 17-iani immikkut ittumik ataatsimiinnitsinni aalajangerparput akileraarutitigut procenti qaffanniarnatigu, aammalu sanaartornermi illuartittakkavut ikilisinniarnatigit. Taamaammat periarfissat marluinnanngorput, tassa sulisorisatsinnik soraarsitsinissaq, aappaattullu innuttaasunik kiffartuussinermi neqeroorutigisartakkatta apparsarlugit taamaalilluni kiffartuussinerput siunissami ajornerulissasoq, tassa 2015-iminngaanniit, Kommuneqarfik Sermersuup borgmesteria Asii Chemnitz Narup oqarpoq.

AAMMA ATUARUK Naligiissaarinissaq inerneqarpoq: Sermersuup 54 mio. koruunit pilliutigissavai

Kommunip aningaasaqarnermut ataatsimiititaliaa ullumi ataatsimiittussaavoq, 54 millionit koruuninik kommuninut allanut akiliinerusalernissap kommunip suleriaqqinnissaanut qanoq kinguneqarsinnaanersoq eqqartorneqassalluni.
 
Isumaqatiginninniarnerilli ingerlanneqarnerat tupinnarnerulersut, Asii Chemnitz Narupip oqaatigaa:
 
- Misigisimavunga isumaqatigiinninniartuusaartoqarsimasoq, pissutigalugu ullumikkut inernerit allakkatigut apuummata takuleriataarpara Naalakkersuisut aalajangernerannut uuttuutaasimasoq, tassa innuttaasut ikiliartortarnerannut tunngasoq oqaluuserineqarnikuunngisaannarparput, isumaqatiginninniutigineqarnikuunngisaannarpoq, taamaattoq ilanngunneqariataarsimavoq. Tamanna pimoorussinertut isumaqarfiginngilara, aamma akisussaassusilittut Naalakkersuisutut sulinerunngilaq, taamaammat tupigusoqaanga, Kommuneqarfik Sermersuup borgmesteria Asii Chemnitz Narup oqarpoq.

AAMMA ATUARUK Kujallermi borgmesterip aaqqiissutaagallartoq iluarivallaanngilaa