Asii C. Narup: Kommuneqarfik Sermersooq kingullinngortinneqarpoq-aasiit
- Kommuneqarfik Sermersooq kingullinngortinneqarpoq-aasiit, taama qulequtalimmik borgmester Asii Chemnitz Narup, Inuit Ataqatigiinneersoq, tusagassiorfinnut nalunaaruteqarpoq.
-174,2 million koruuninit 34,1 million koruuninik aningaasaliiffigineqartussanngortugut nalunaarutigineqarpoq, imaappoq 19,5 procentit. Nuna tamakkerlugu suliffissaaleqisunit 32,6 procentit kommuunitsinninngaanneersuupput. Kisitsisit taakku imminnut naapertuunnissaat kissaatiginaraluaqaaq, Asii Chemnitz Narup nassuiaavoq.
Suliffissaaleqisut ikilisarneqarnissaannut suliniut ajunngikkaluarluni suli amigaateqartoq, matumanilu siunissaq ungasinnerusoq isigalugu periusissamik Asii Chemnitz Narup amigaateqarnerarpoq immikkullu aningaasaliisoqarnissaa pisariaqarnerarlugu. Taamatuttaaq inuiaqatigiit agguataarnerannik, nuttarnermik sanaartugassanillu pisariaqartitsinerannik aallaaveqartumik politikkiliortoqarnissaa pisariaqarnerarpaa. Aamma isumaqarpoq Naalakkersuisut partiimi politikkikkut eqqarsaatit pingaarnerutissimagaat:
-Siullermiilinnginnatta kommuunit allat Siumukkormiunik borgmesteriutitaqarnerat malugisarlugu. Uagut kommuunitsinni partiit katitigaanerat allaavoq, tassani Inuit Ataqatigiit siuttuupput. Sooruna uagut allatuulaartumik pineqalaartuaannaavittugut, taanna apeqqut nipituumik apeqqutigisariaqalerlugu misigisimavunga. Uangaannaanngilaq, kommunalbestyrelsemili ilaasortat qassit taama eqqarsalerpat.
Kommuneqarfik Sermersuup borgmesteriata, Asii Chemnitz Narupip, Naalakkersuisut aningaasanik agguaassisimanerannut periuserisimasaat aamma apeqquserpai napertuutinnginnerarlugit, Naalakkersuisullu nassuiaanissaat minnerpaamillu Aningaasaqarnermut Ataatsimiititaliamut nassuiaasoqarnissaa piumasaraa.
