Asii: Ajornerusumik pineqarpugut

Kommuneqarfik Sermersuup borgmesteria, Asii Chemnitz Narup isumaqarpoq, Kommuneqarfik Sermersuumi suliffissaaleqisut arfinilerarterutaasa missaat, tassa 15,6 procentiisa missaat, kommuninit allanit Kommuneqarfik Sermersuumut siorna nuuttut eqqarsaatigalugit, Nunatsinnilu suliffissaaleqianerup akiorniarneqarneranut atatillugu, Naalakkersuisunit kommuni immikkoortinneqartoq.
apriilip 24-at 2014 03:08

- Noqqaassutigisarput tassaavoq, kommuninut allanut sanilliulluta ajornerusumik pineqarnitta unitsinneqarnissaa, assigiimmimmi pineqarusukkatta.
 
Kommuninit allanit Kommuneqarfik Sermersuumut nuuttut ilaat 200-it missaanniittut maanna suliffissaaleqisuupput, taakkulu inunnik isumaginninnermut tunngasunut aningaasartuutaallutik. Taannaannaanngilarli aamma kommunit allat Namminersorlutik Oqartussat nuna tamakkerlugu suliffissaaleqinermik akiuiniarnerannut atatillugu, kommunit allat, suliffissaaleqisumut ataatsimut agguaqatigiissillugu 37.000 koruuninik tapiissutisisartut, Kommuneqarfik Sermersooq taamaallaat 24.000 koruuninik tapiissutisisarpoq. Tamannalu immikkoortitsinertut isigineqarsinnaasoq, Kommuneqarfik Sermersuup borgmesteriata, Asii Chemnitz Narupip oqaatigaa.
 
- Isumaqartoqassappat aningaasaliissutit ikinnerit atorlugit suliffissaaleqinerup akiorneqarnissaanut peqataassasugut, tamanna eqqortutut isumaqarfiginngilarput tassami allatulli pineqarusukkatta, Asii Chemnitz Narup oqarpoq.
 
Suliffissaaleqisut taama amerlatigisut kommunimut nuunneranni, inunnik isumaginninnermut aningaasartuutit soorunami annertunerulersussaasut, Asii Chemnitz Narup oqarpoq.

Aamma atuaruk: Nuummi suliffissaaleqisut akornanni avataaneersut amerlaqaat

- Soorunami suliffissaaleqisut allatulli ikiorneqarnissaannik pisussaaffeqarpugut tamannali matumani pingaarnerunngilaq, pingaarnerusorli tassaavoq, kommuneqarfinnut allanut naleqqiulluta aningaasatigut ajornerusumik pineqarnerput maanna naammagiubnnaaratsigu.
 
Nunatsinni suliffissaaleqinerup akiorneqarnissaanut atatillugu, soorlu Qaasuitsup Kommunia Namminnersorlutik Oqartussanit 11,3 million koruuninik tapiiffigineqartoq Kommuneqarfik Sermersooq taamaallaat 9,4 million koruuninik tapiiffigineqarpoq.
 
- Suliffissaqartitsiniarnermut akiuiniartoqartillugu ileqquuvoq kommunit akileeqataasarnerat. Kingullermik taamatut iliortoqarmat Naamminersorlutik Oqartussanit Kommuneqarfik Sermersooq, 9,4 million koruuninik taperneqarpoq Qaasuitsulli Kommunia 11,3 million koruuninik taperneqarluni, taamaalilluta assigiinngitsumik pineqarluta. Kommuneqarfik Sermersuup borgmesteria, Asii Chemnitz Narup taama oqarpoq.
 
Kommunalbestyrelsip aningaasaqarnermut ataatsimiititaliaata, maajip aallaqqaataani immikkut ittumik ataatsimiinnissaanut atatillugu, Aningaasaqarnermut Naalakkersuisoq Vittus Qujaukitsoq aamma Inuussutissarsiornermut Naalakkersuisoq Jens-Erik Kirkegaard qaaqquneqarput.