Arsaannermi festivalernissamut Qaanaaq piareersarpoq

Arsaannissap qanoq piviusunngortissinnaanissaannik, pilersaarusiornissaanik aamma aaqqissuunnissaanik, Qaanaami nunaqarfinnilu sungiusaasut tallimanngorpat arfininngorpallu ilinniartinneqassapput.
 
Sungiusaasut ilinniakkatik misilerarlugit, sapaatiuppat aallartittumik, meeqqat inuusuttuaqqallu akunnerni pingasuni arsaannernik assigiinngitsunik arsaatsinneqassapput.
 
Qaanaami nunaqarfinnilu sungiussaasut sungiusartinneqassapput, Grønlands Boldspil Union-ip aallartitaanit, Kent Kielsenimit aamma DBU-mi FIFA-milu sungiussanermik ilitsersuisumit, Thomas Slosarich-imit.
 
Arsaannermik festivaleqarnerit Tasiilami, Uummannami Aasiannilu siorna aasakkut ingerlanneqartut iluatsiffioqaat. Festivaleqalerneranilu sungiusaanermi atortut atorneqartut tamarmik illoqarfinni klubbinit tigummiinnarneqarput.
 
FIFA-p præsidentiata, Sepp Blaterip, Nunatsinnut 2012-mi tikaarnerata kinmgorna, arsaannermik festivaleqartarnerit pilersinneqarput. FIFA-llu aningaasaliineratigut Nunatsinni arsaattarneq siuarsarneqalerluni.