Arnat eqqumiitsuliortut saqqummersitsineq quarsaarutigigaat: Tusarniarneqaqqaannginnerput oqaatiginiagaannut assortuuppoq

Ilulissani Eqqumiitsulianut Katersugaasivik arnat eqqumiitsuliortut nunatsinneersut 26-t suliaannik saqqummersitsiviuleruttorpoq.

Arnat eqqumiitsuliortut nunatsinneersut Ilulissani Eqqumiitsuliortunut Katersugaasivimmeersut oqarnerat naapertorlugu inuiaqatigiit akornanni eqqartugaanngikkajummata, ukiuni kingullerni 24-ni suliaasimasunik Backbonemik taallugu saqqummersitsinikkut nersorniarneqarput.

Saqqummersitanilli eqqumiitsuliortut ilaasa suliatik saqqummersinneqassasut ilisimatinneqarsimanngillat. Tassa suliaminnik saqqummersitsisoqartoq saqqummersitsineq ammareersoq aatsaat paasisimagitsik, eqqumiitsuliortut arnat nunatsinneersut tallimat tassaasut Lisbeth Poulsen, Paarma Brandt, Bolatta Silis-Høegh, Ivinguak Stork Høegh og Cecilie Christiansen KNR-imut oqarput.

Taamaanneralu quarsaarutigaat.

- Aalajangersimasumik qulequtsikkamik saqqummersitsinermi peqataarusunnersugut apereqqaaqqaangivilluta suliatta ilaasa saqqummersitsinermi ilanngunneqarsimammata tupinnaqaaq.

- Saqqummersitsineq kalaallit arnartaasa tusaaneqarnerunissaannut tunngasuusoq oqaatigaat, apereqqaarnatali suliatta ilaat saqqummersitsinermut ilannguppaat, Lisbeth Poulsen oqarpoq. Taassuma suliamik ilaat saqqummersitsinermut ilanngunneqarsimasut nalaatsornerinnakkut paasivaa.

Apereqqaarsimasuuppatigut akuersisimassagaluarpugut

Saqqummersitamik ilaannik suliarinnittut apereqqaanngivillugit eqqumiitsuliaannik saqqummersitsinerat arnat tusaaneqarnerunissaannik saqqummersitsinermi oqaatiginiagaannut assortuuttuusoq, Paarma Brandt aamma isumaqarpoq.

- Quarsaarpunga. Ilisimateqqaanngivillunga eqqumiitsuliama ilaannik saqqummersitsinerminni ilangussinerat ileqqorluttuliornerusoraara. Eqqumiitsuliannik nunani assigiinngitsorpassuarni saqqummersitsisarninni assingusumik nalaataqarnikuunngisaannarpunga, taanna oqarpoq.

Bolatta Silis-Høegh ilaliivoq. Taanna ukiut 21-ssaannik eqqumiitsuliortuuvoq, suliaanillu nalusaanik saqqummersitsisunik nalaataqarsimanngisaannarluni taanna oqarpoq.

- Backbone tusaannarlugu saqqummersitsinermi qulequtsiutissaqqissorinarpoq, eqqumiitsuliamali ilaat tassani ilanngunneqarsinnaanersut aperineqaqqaarsimasuuguma akuersisimassagaluarpunga. Saqqummersitsinermili taamaattumi nalusannik ilanngunneqarsimanera nuanniigeqalugulu killissamik qaangiinerusoraara, taanna oqarpoq.

Cecilie Christiansenip eqqumiitsuliaanik aatsaavissuaq saqqummersitsisoqarpoq. 

- Eqqumiitsuliamali ilaat saqqummersitsinermi ilanngunneqarsinnaanersut aperineqaqqaannginnera saqqummersitsinerullu ammarnissaanut allaat qaaqqusaannginnera uumitsaatigeqalugulu nuanniigeqaara, eqqumiitsuliortutut ilinniarnerminik naammassinneqammertoq Cecilie Christiansen oqarpoq.

Suliami soorliit Ilulissani Eqqumiitsulianut Katersugaasivimmi saqqummersitsinermi ilanngunneqarsimanersut suli nalugini, Eqqumiitsuliornermik Ilinniarfiup Nuummiittup pisortaa Ivinguak Stork Høegh oqarpoq.

- Saqqummersitsinermi suna sammineqarnersoq eqqumiitsuliannilu sorliit saqqummersitsinermi ilanngunneqarsimanersut ilisimateqqaarsimanissara soorunami kissaatigigaluarpara. Ilisimatinneqaqqaanngilangali, taama oqaannarsinnaavunga, taanna oqarpoq.

Eqqumiitsuliatik pisortamut tunigaat tunigaat

Inuttaali ilisimateqqaarnagit eqqumiitsuliaannik saqqummersitsinissaq sooruna ajornarsimanngitsoq?

Eqqumiitsuliatilli Ilulissani Eqqumiitsulianut Katersugaasiaviup pisortaanut Andreas Hoffmannimut tunisatik tamarmik saqqummersitsinermi ilanngunneqarsimasut, Lisbeth Poulsen, Paarma Brandt aamma Cecilie Christiansen oqarput.

Eqqumiitsuliatilli taakkua Ilulissani Eqqumiitsulianut Katersugaasivianuunngitsoq pisortaanulli tunimmatikkit saqqummersinneqarnissaat naatsorsuutigisimanngilaat.

- Eqqumiitsuliortutut sulivunga, inuussutissarsiutigalugulu. Eqqumiitsuliakka nukippassuit piffissarujussuarlu atorlugit naammassisarpakka. Eqqumiitsuliakkalu Ilulissani Eqqumiitsulianut Katersugaasivimmi saqqummersitsinermut ilanngussat katersugaasivimmut tuninagit pisortaanut tinivakka, Paarma Brandt oqarpoq.

Eqqumiitsuliaminik Ilulissani Eqqumiitsulianut Katersugaasivimmut ukiualuit matuma siorna tunisaqarluni, Bolatta Silis-Høegh oqarpoq. Taamaammat eqqumiitsuliaa taanna Ilulissani Eqqumiitsulianut Katersugaasiviup pisiarinikuummagu saqqummersitsinermi ilanngussinnaatitaavaa. Bolatta Silis-Høeghili katersugaasivinnik eqqumiitsuliortut ilisimateqqaarnagit suliaannik aalajangersimasumik qulequtsiilluni saqqummersitsinissamut ilanngussaqarsimasunik siornatigut nalaataqarsimanani taanna oqarpoq.

- Eqqumiitsuliatsinnik aalajangersimasumik qulequtsiilluni saqqummersitsinissamut ilanngussaqartigatik akuersiteqqaartussaavaatigut. Eqqumiitsuliortuusugummi ativut illersorsinnaasariaqarpagut 

- Eqqumiitsuliatsinnik aalajangersimasumik qulequtsiilluni saqqummersitsinissamut ilanngussaqartigatik akuersiteqqaartussaavaatigut. Suliatsinnummi piginnittussaatitaanitsinnut tunngassuteqarpoq, taanna oqarpoq.

Taamaammat Bolatta Silis-Høeghip eqqumiitsuliani saqqummersitsinermiit peeqqummagu, Ilulissani Eqqumiitsulianut Katersugaasivik ajornaquteqanngitsumik akuersivoq.

Eqqumiitsuliani sorleq saqqummersitsinermi ilanngunneqarsimanersoq Ivinguak Stork Høegh aperigatsinni nalulluinnarini oqaatigaa. Eqqumiitsuliaminik katersugaasivimmut tassunga tunisinikuunani plakatiliaminilli katersugaasivimmi tassani tuniniagassanik tunisinikuulluni, taanna oqarpoq.

Katersugaasiviup saqqummersitsinera iluatsittoq

Ivinguak Stork Høeghip Ilulissanut Eqqumiitsulianut Katersugaasivik suli attaviginngilaa, taamaaliorniarlunili.

Lisbeth Poulsenip, Paarma Brandtip aamma Cecilie Christiansenip eqqumiitsuliatik saqqummersitsinermiit peeqquaat. Tamatuma saniatigut Ilulissani Eqqumiitsulianut Katersugaasivimmut Avannaata Kommunianullu aamma naammagittaalliuteqarput.

Naammagittaalliutaat inatsisilerituumit allakkatigut akineqarpoq, inatsisilerituullu akissuteqartup inatsisit eqqumiitsuliortunut akissummini innersuussutigai. Eqqumiitsuliallu allanut saqqummiuteriikkat tunniuteriikkalluunniit inatsisini allaqqasut naapertorlugit tamanut saqqummiunneqarsinnaatitaasut, taanna oqarpoq.

Katersugaasiviulli taamaaliornera nunatsinni eqqumiitsuliortut atugaannik eqqarsaatiginninnginnerummat ileqqorluttuliornerusoq, eqqumiitsuliortut pineqartut isumaqarput.

- Katersugaasivik taanna arnat eqqumiitsuliortut nunatsinneersut iluaqutigalugit iluanaarniarpoq. Allaammi saqqummersitsinerup taassuma ammarnissaanut qaaqqusaanngilagut. Ilaatinneqanngilagut, taaneqanngilagut aamma arlaannaatigulluunniit peqataatinneqanngilagut, Lisbeth Karline Poulsen oqarpoq.

Ilulissani Eqqumiitsulianut Katersugaasiviup pisortaa, Andreas Hoffmann, sooq eqqumiitsuliortut taakkua apereqqaarnagit suliaasa saqqummersitsinermi ilanngussimanerai taakkunanngalu isornartorsiorneqareeraluarluni tamannarpiaq pillugu sooq aalajangiusimaannarnersoq aperiniarlugu oqaloqatigiumagaluarparput.

Taannali piumanngilaq, allakkatigulli ima akilluta:

- Backbonemik taallugu saqqummersitsinerput kulturimut politikkimut attuumassuteqarluinnartuusoq iluatsillluaqisoq ammarmalli ulluni siullerni alakkaasut ullormut 60-it missaanniittartut eqqumiitsuliortutut ilisimanngisatik suliaannik takunnipput. Tamanna nuannaarutigaarput, Andreas Hoffmann KNR-imut akissummini allappoq.

Saqqummersitsineq marsip ulluisa 28-anni ammarpoq.