Arfinilinnik ukiulik Manumina, DIH-mi toqusoq, atuarfimmi aqagu eqqaaniarneqassaaq

Meeqqanit 400-nit atualerluni katersuunnermit nipitunerusut amerlanngillat.

Aqaguli nalunaaqutaq aqqanermut Nuummi Atuarfik Samuel Kleinschmidtimi nipaalleqqinnaassaaq.

Arfinilinnimmi ukiulik Manumina Olsen, Dronning Ingridip Napparsimmavissuani juunip aallartinnerani toqusoq ataqqiniarlugu minutsimik ataatsimik nipaallisimasoqassaaq.

Atuarfiup pisortaa Margrethe Brummerstedt taama oqaluttuarpoq:

- Atuartup maani atualertussaagaluartup eqqaaniarneqarnissaa ASK-imi aalajangerparput. Minutsimik ataatsimik nipaallisimalluta eqqaaniassavarput, naasunillu inniminniivugut niviarsiaqqap ilerranut ilisassanik, oqarpoq.

Manumina aqagu 1. klassemi atualertussaagaluarpoq.

Aasaaneranili atuanngiffeqalinngitsiartoq DIH-mi neqertaajartilluni suliaritereerluni toquvoq. 

Suliaritinneq kukkunermik kingornalu ilaginnarneqarnermik imaqangaatsiarsimanera pissutigalugu suliaq maanna Nunatsinni Nakorsaaneqarfimmut politiinullu ingerlateqqinneqarsimalluni.

Inimilu atuarfiusumi inoqanngitsumik issiaveqartussanngornera initussaaq. Taamaammat malunnartinneqassasoq, Margrethe Brummerstedt isumaqarpoq: 

- Atuaqatissai aqagu atualissapput. Taamaammat atuarfimmi taamaaliorpugut, oqarpoq.

Artornartut pillugit oqaloqatigiinnissamut atuarfik piareersimavoq

Manuminap meeqqat aqagu atualeqqaartussat arlaqartut ilisarisimasimavai. Atualeqatiginissaa qilanaarisimavaat. Atuarfiup taamaammat taakkoqqissaat isumaginiarpaat oqaloqatigalugillu eqqarsaatitik pillugit kisimiinnginniassammata:

- Meeqqat oqaloqatiginissaannut ilinniartitsisut piareersimareerput. Nalunngilara Illu aamma pisoq pillugu meeqqanik oqaloqateqareersimasoq. Maanilu marlunnik inunnik isumaginninnermi siunnersorteqarpugut, ilinniartitsisullu oqaloqatiginninnissaminnut nukissaqarluarput, oqarpoq.

Manuminalli klasseani kisimi inuttaa oqaluuserineqarnavianngilaq. Tamanna atuarfimmit ilisimaneqareersoq, Margrethe Brummerstedt oqaluttuarpoq.

Niviarsiaqqap toqunera tusalertugaavoq, taamaammallu atuartut eqqarsaataat misigissusaallu matuneqannginnissaat pingaaruteqarluni. Akerlianilli pimoorunneqassapput oqaluuserinissaanullu sapiissuseqartoqarluni:  

- Klassit sinnerini aamma oqaluuseraarput. Qatanngutaasa ilaat ataaseq maani atuartuuvoq. Klassia taamaammat immikkut iliuuseqarfigaarput, oqarpoq.

Ullorli qanorluunniit artornartussaavoq Manuminallu toqunera atualernermi nuissatut tarrajutsitsissalluni. 

- Angajoqqaavi ikinngutaalu misiginneqatigaakka. Ila misiginneqatigeqaakka, Margrethe Brummerstedt oqarpoq.