Arfattassiissutit KNAPK-mi nuannaarutigineqartut

Arfanniarneq pillugu ataatsimiititaliarsuarmi IWC-mi, ilaasortat amerlanerussuteqarluartut, Kalaallit Nunaata ukiunut tulliuttunut sisamanut arfattassiissutissatut siunnersuutaat ippassaq akuersissuteqarput. Tamannalu Naalakkersuisunit nuannaarutigineqarluarpoq.
septembarip 16-at 2014 10:10

Aamma tamassumunnga nuannaaruteqartunut ilaavoq, Piniartut Aalisartullu Kattuffiata siulittaasua, Henrik Sandgreen.
 
- Tassa Nunatsinnut tunngatillugu nuannaarutigisariaqarparput, nunarsuarmioqatitsinnit neqissaqarniarnerput pillugu aamma arfanniartutut ilaatigut inuuniuteqarnerput maanna paasilluarneqariartuinnalermat, KNAPK-p siulittaasua, Henrik Sandgreen oqarpoq imalu nangilluni.

AAMMA ATUARUK Nunatsinni arferit 207-it pisarineqarsinnaasut IWC-mi akuersissutigineqarpoq

- Nunatsinni arfanniarnermut attuumassuteqartut, tassa uumasorsiuut, piniartut, Naalakkersuisut aamma Danmarkimi naalakkersuisut siunissami suleqatigiinnermikkut, nunarsuarmioqatitsinnit maanna paasineqarnerulernerput aallutissagaat maanna kissaatigiinnassavarput, Henrik Sandgreen oqarpoq.

Siunissami neqissaqarniarneq qulakkeerneqassaaq
Taassuma ilanngullugu oqaatigaa, suleqatigiinnikkut Nunatsinni arfanniarneq pillugu paasititsiniaanerup maanna aallunneqarnerulernissaa kissaatigalugu.
 
- Taamaaliornikkut siunissami neqissaqartuarnissarput qulakkeerneqassaaq, tamannalu isumalluarnarpoq.
 
Henrik Sandgreenip aamma naatsorsuutigaa, ukiunut sisamanut pisassiisarnermi, siunissami neqissaqarniarnitta aaqqissuussaanerusumik pilersaarusiortalernissaa Nunatsinni arfanniartunut iluaqutaajumaartoq, Aalisartut Piniartullu Kattuffianni siulittaasoq, Henrik Sandgreen taama oqarpoq.