Arfattassat qulinik ilanissaat Danmarkip tapersersorpaa
Folketingip avatagiisit pillugit ataatsimiititaliaani isumasiuisoqareermat peqataasut iluarusuppasillutik aniapput. IWC-mimi ataatsimeersuartoqalerpat nunatta soqutigisai Danmarkip nunanut allanut ministeriata illersorniarlugit Nunatta sinniisaanut neriorsuisimammat.
- Kalaallit arfattassaasa qulinik ilaneqarnissaat kissaatigigaat nalunngilarput tapersersorlutigulu. Kalaallimmi kissaataat malillugu arfattassiissutissat amerlassusissaat ilisimatuut aalajangertariaqarpaat, kissaataallumi taanna aamma tapersersorparput, Nunanut allanut ministeri Villy Søvndal oqarpoq.
Danmarkip nunattalu IWC-mut siunnersuutigaat nunatsinni tikaagulliusaartassat kitaani ukiumut qulingiluanik ilaneqassasut qipoqqartassallu ataatsimik ilaneqarlutik. Tamannalu Doris Jakobsenip Siumumeersup naammagisimaarpaa.
- Arfattassavummi amerlineqartariaqarput, taamaammat Danmarkimi Naalakkersuisut maanna inissisimanerat iluarisimaarpara, Doris Jakobsen oqarpoq.
Sara Olsvigilumi aamma naammagisimaarinnippoq.
- Oqaatigisaat allatarisaaniit erseqqarinnerusoraakka. Aamma pisuussutinik uumassusilinnik atuinissap nungusaataanngitsumik ingerlanneqarnissaa Nunatta pingaartitarisuugaa tikkuartuukkusussimaqaara. Ilami aalisagartassat, pisassiissutillu allat pineqaleraangata ilisimatuut innersuussissutaat Nunatta naalakkersuisuisa pingaartitarisuuaat, Sara Olsvig oqarpoq.
Marlussutsigulli isumaqatigiinngillat. Atlantikulli kujataatungaani arfanniartarfioqqusaanngitsumik pilersitsisoqarnissaa kalaallit akerlilerpaat. Eqqissisimatitsiffiusumilli pilersitsiniaraanni nunat attuumassutillit isumaqataaqqaasarnissaat isumaqatigiissutigaat.
- Kattuffissuimmi naalakkersuinermik suliaqanngitsut paasititsiniaanissamut akissaqarluartut ilanngutissagaluarpata oqimaaqatigiittoqarunnaassasoraara, uagummi aalisartortatta piniartortattalu kattuffiit paasititsiniaanissaminnut akissaqanngillat, Sara Olsvig oqarpoq, kattuffiaqqallu kattuffissuartuulli IWC-mi aamma oqaaseqarsinnaatitaanissaat qulakkeerumallugu, taamaasiortoqarneratigummi KNAPK-p isummersorsinnaanera Danmarkip nukittorsaaqataaffigissagaluarmagu.
- Kattuffissuit nunarsuatsinniittut unammillersinnaassagutsigit KNAPK nunatsinniinnaanngitsoq aammattaarli Danmarkimiit tapersersorneqartariaqarpoq. Sara Olsvig oqarpoq.
