Aqqaluup Aneerasaartarfiata sanaartorfigineqarnissaa Steen Lyngep aamma akerleraa

Inatsisartut Ataatsimiittarfittaassaata Nuummi Aqqaluup Aneerasaartarfianut inissinneqarnissaanut arfininngormat akerlissutsimik takutitsisoqarmat inuit 1000-t missaat peqataapput, taakkununngalu politikeri Steen Lynge ilaasimasinnaagunaraluarpoq.
aggustip 25-at 2014 10:26

Atassut sinnerlugu Naalakkersuisunut ilaasortap Inatsisartut ataatsimiittarfittaassaata Nuummi Nuutoqqami sanaartorneqarnissaa isumaqatiginngilaa.

- Inatsisartut ataatsimiittarfissaata sumut inissinneqarnissaa pillugu Nuummi innuttaasutut isummersinnaatitaavunga, Steen Lynge KNR-imut oqarpoq.

AAMMA ATUARUK Inatsisartut ataatsimiittarfissaata inissisimaffissaanut akerliussutsimik takutitsisorpassuit

Knud Kristiansenip, partiip siulittaasuata tulliata, Steen Lyngep nammineq inuttut isummersinnaanera ataqqivaa.

- Steen Lyngep nammineq isummernera ajoriffissaqartinngilara. Atassummimi assigiinngiiaartunik isumaqarnissamut inissaqarluartitsivugut.

- Inatsisartulli ataatsimiittarfittaassaata Aqqaluup Aneerasaartarfiani sanaartorneqassanersoq ataatsimoorluta nalilersorumaarparput, Knud Kristiansen oqarpoq.