Annikinnerusumik pujortarlutalu imigassartortalerpugut
Nunatsinni imigassartorneq pujortarnerlu ukiuni kingullerni annikilliartulersimavoq, kisitsisit Kalaallit Nunaanni Naatsorsueqqissaartarfimmeersut nutaat tamanna takutippaat.
Naallu imigassartornerup pujortartarnerullu annikilliartornera innuttaasut peqqissusaannut pitsaagaluartoq, imigassamit tupamillu akitsuutitigut isertitat ikiliartorput, Nunattalu karsiata isertitai taamaalillutik ikilissallutik.
Nunatsinni tupamik tunisaqarneq ukiut 20-t kingulliit ingerlaneranni affaannanngorsimavoq, allaallumi 2012-imit 2013-imuinnaq ataatsimut isigalugu 35 procentimik annikillisimalluni.
Tupa nunatsinnut eqqunneqartoq 1994-imiilli maannamut, ukiumiit ukiumut annikilliartortuarsimavoq. Cigaritsit 1994-imi eqqunneqartut 127 millioniupput, siorna 44 millioniusimallutik.
Cigaritsinilli atuineq kisimi annikilliartunngilaq. Tupalli akitsuusersukkat allat Nunatsinnut eqqunneqartartut aamma ikiliartorput, tassa sikaat, cerutsit, tupa pujortaammik pujortagassiaq, tupallu imusassiat aamma annikilliartuinnalersimammata.
Nunatsinnilu tupamik atuinerup annikilliartuinnarnera Nunatta karsiata isertitaanut sunniuteqarpoq. Kisitsisit 2012-imiit 2013-imut tunngasut qiviaannaraanni takuneqarsinnaavoq, akitsuutitigut isertitat 202 millioniusimariarlutik 141 millioniinnanngorsimasut.
Imigassamillu aalakoornartumik eqqussuineq immiortarnerlu aamma annikilliartorput. Imigassarmi aalakoornartulik Nunatsinnut eqqunneqartartoq ukiut kingulliit qulit ingerlaneranni 21,2 procentimik annikillisimavoq. Tassa kisitsisit viinninut, immiaaqqanut imigassamullu kimittuumut tunngasut.
Tassa kisitsit imigassamut kimittuumuinnaq assersuusiarigaanni takuneqarsinnaavoq, imigassaq kimittooq siorna eqqunneqarlunilu imigassiarineqartoq 388.000 liiteriuvoq, 2012-imut naleqqiullugu 40.000-it liiterinik annikillisimalluni. Aalakoornartumilli atuinerup annikilleriarsimanerata Nunatta karsianut sunniuteqaatigisimasai kisitsisini takuneqarsinnaanngilaq.
