Aningaasaqarnermut Siunnersuisoqatigiit nalunaarusiaminnik saqqummiussilerput
Aningaasaqarnermut Siunnersuisoqatigiit Naalakkersuisunit 2009-mi pilersinneqarput, nalunaarusiaasalu tallimassaat maanna saqqummiunneqartussanngorluni. Akit qaffasissusiisa nikerarnerat, pisortallu aningaasaqarnerisa napatinneqarsinnaassusiat ukiut tamaasa naliliiffigisarpaat, ineqarnerlu ukioq manna immikkut sammineqarsimavoq.
Aningaasaqarnermut Siunnersuisoqatigiit siulittaasuuffimmit arfinilinnik inuttaqarfisumit aqunneqarput, tassaallutillu:
Siulittaasoq Torben M. Andersen, Aarhus Universitetimi professori,
siulittaasup tullia Ulla Lynge, Sermersuumi Inuussutissarsiornermut Siunnersuisoqatigiinni pisortaq.
Aningaasaqarnermut Siunnersuisoqatigiinni ilaasortat taassuma saniatigut tassaapput:
Anders Møller Christensen, Naalagaaffiup Aningaaserivissuaneersoq,
Tønnes Berthelsen, KNAPK-meersoq,
Søren Bjerregaard, Danmarkimi Aningaasaqarnermut Nunamullu Namminermut Ministereqarfimmeersoq, kiisalu
Anders Blaaberg, Kalaallit Nunaanni Naatsorsueqqissaartarfimmeersoq.
Siulersuisut saniatigut Aningaasaqarnermut Siunnersuisoqatigiit soqutigisaqaqatigiiffinnit, Naalakkersuisut allaffissornikkut aqutsisuinit ilisimatusarnermullu suliffeqarfinnit ilaasortaaffigineqarput.
Siunnersuisoqatigiinni ilaasortat nalunaarusiap imaanut oqaaseqaateqarsinnaatitaapput, siulittaasoqarfimmili ilaasortat kisimiillutik nalunaarusiap imassavianut akisussaasuupput.
