ASSIT Angutit sisamat qamuteralaat snescooterit atorlugit tuttunik malersuisut imaanullu qimaatillugit
Angallat takornarianik ilaasulik Qooqqunut sapaatiummat tikimmat, ilaasui gummibådinik ikaassorneqarnerani takuneqarsinnaasimapput qamuteralaat snescooterit piaaralutik tuttunik malersuisut immamullu qimaatillugit, pisimasumut takunnittoq aterminillu saqqummiusserusunngitsoq KNR-mut oqaluttuarpoq.
Tuttut pingasut immamiittut takuagut, taakkua nunamut qaqiniarsarinngillat qaqigunik qanoq pisoqassanersoq naatsorsuutigisinnaassagamikku, pisimasumut takunnittoq oqaluttuarpoq.
- Ukiut 30-it sinnerlugit umiartortuuvunga aamma aasat tamaasa aavartarlunga - tuttunik ukiukkut imaaniittunik takunikuunngisaannarpunga taamaattumik takusat immikkut illuinnartuupput, takunnittoq oqarpoq.
Angallat aqisserniartunik ilaasulik sapaatiummat Qooqqunut tikimmat apeqqammerpoq - tassanilu takuneqarsinnaapput snescooterit qulaaniit ammut immap tungaanut ingerlaartaqattaarsimanerat.
Angutit sisamat snescooterinik tuttunik malersuineranni - takunnittoq - angallatit radioatigut Aasiaat Radioatigut- pisimasoq politiinut nalunaarutiginiarlugu attaveqarpoq - nammineq oqarneratut - pisimasumut isiginnaaginnaruni qanoq iliuuseqaranilu pisooqataasutut pineqarsinnaagami, takunnittoq KNR-imut oqarpoq.
Nuummi Snescooterertartut peqatigiiffiata, Qamutit pisimasoq akuersaanngilluinnarlugu nittartakkami Facebook-imi allagaqarput.
Peqatigiiffiup Qamutit siulersuisuisa erseqqissarpaat, peqatigiffimmi Snescooterforeninge-mi Qamutit ni ilaasortaanermi takutinniarneqarmat, qamuteralannik snescooterinik akisussaassusilimmik ingerlaartarnerup pinngortitaq uumasulluunniit ulorianartorsiortittanngikkai.
- Taamaattumik peqatigiiffiup Qamutit sapaatip akunnerata naanerani pisimasoq akuerinngilluinnarpaa ilumoorpat ilumuunngippalluunniit. Neriuppugut una nalunaarut eqqarsalersitsiumaartoq, Qamutit siulersuisui taama allapput.
- Ilisimavarpulli inuit ikittunnguit ajortumik iliuusaasa amerlasuut eqqortaraat inuillu tamarmik iluamik eqqarsartanngitsut, peqatigiiffik Qamutit nittartakkami Facebookimi taama allappoq.
Sermersuumi politiit Qooqquni pisimasumi inatsisinik unioqqutitsisoqarsimanersoq misissorpaat, angutit sisamat qamuteralaat atorlugit tuttunik malersuillutik imaanut qimaatitsisimasut pillugit.
Pisimasoq Sermersuumi politiinut sapaatiummat nalunaarutigineqarpoq, Poul Petersenillu politiineersup pisimasoq maanna misissuiffigaa, tuttunniarnerunersoq imaluunniit uumasunik naalliutsitsinerunersoq paasiniarlugu.
Kisianni tassa politiit ilisimasaat tassaavoq angutit sisamat pineqartut inuussutissarsiutigalugu piniartuunngimmata tuttunniarsinnaatitaanngitsullu.
Uumasunik naalliutsitsineq pineqarpat akiliisitsinermik kinguneqartitsisoqarsinnaavoq annerusumillu politiinit iliuuseqartoqarnissaa naatsorsuutigineqanngitsoq, Poul Petersen Sermersooq politiivineersoq oqarpoq.
