Angutit marluk toqutaasimasut Kangerlussuarmi nassaarineqarput
Angutit marluk toqungasut nassaarineqarput pingajuallu arnaq 34-nik ukiulik annertuumik ikilerneqarsimavoq tamanna pivoq erngunnerup kingorna persuttaasoqarneranut atatillugu.
Angutip aappaata imminut toqussimanissaa naatsorsuutigineqarpoq, Qeqqata politiivi taama nalunaarput.
Kangerlussuarmi politeqarfik sisamanngornerup ullaassaani innuttaasumit nalunaarfigineqarpoq najugaqarfiusumi Rustenborgimi allaasersortoqartoq tusaasimallugu.
Politiit allaasersorfiusimasumut apuummata, angutit marluk aappaa 33-nik aappaalu 29-nik ukiulik aallaaneqarsimallutik toqungasut nassaarineqarput.
Toqusut qanigisaat ilisimatinneqarsimapput.
Arnaq 34-nik ukiulik aallaasersortoqarnerani aallaasersorfiusumiittoq annertuumik ikilerneqarsimavoq taanna siullermik
Nuummut napparsimavissuarmut Dronning Ingridip napparsimavissualiaanneqarpoq, ullumilu tallimanngornermi Danmarkimi napparsimavissuup Rigshospitalip peruluttunut immikkoortortaqarfianut aallarunneqartoq, Qeqqata politiivini immikkoortami pisortaq Johan Davidsen radioaviisimut oqarpoq.
Politiit toqusoqarneranut atatillugu paasissutissanik annertunerusunik tunniussaqarsinnaanngillat, pisimasoq suli misissuiffigineqarmat, Qeqqata politiiviini pigaartoq oqaluttuarpoq.
Misissueqqaarallarnermit paasisat qanoq pisoqarsimasinnaanera ilimanarsisippaa, aamma ilimagineqanngilaq allamik pasisamik suli tigusarinnittoqarsimannginneranik qeqqata politiivinit Johan Davidsen oqarpoq.
Teknikerit pinerluttoqarsimatillugu paasiniaasartut Kangerlussuarmiipput aamma toqusoqarsimatillugu paasiniaasartut Danmarkimeersut aggersarneqarput, taakkualu marlunngorpat apriilip arfineq aappaanni tikinnissaat naatsorsuutigineqarpoq. Taakkua saniatigut teknikerit pinerluttoqarsimatillugu paasiniaasartut Danmarkimi Rigspolitiinit ikiorneqarnissaminnik kissaateqarsimasut, politiit tusagassiuutinut nalunaaruteqarlutik taama allapput.