Angutip ikiaroornartumik eqqussuineq Danmarkimit aqussimavaa
Pinerluuteqarsimasut arlallit anngiortumik eqqussuisimasutut aamma peqquserluutinik aningaasaliorsimasutut politiinit unnerluutigineqarsimapput.
Allattoq Elisa Isaksen
apriilip 17-at 2014 16:49
Ikiaroornartumik hashimik anngiortumik eqqussuisimanermut tunngasoq, apriilip 14-ianni eqqartuussivimmi suliarineqarpoq. Taama pinerluuteqarnermi tunuliaqutaasimasoq, hashimik anngiortumik eqqussuinermi attaveqaatinik pilersitsisimasutut, ukiuni sisamani pineqaatissinneqarsimasunut inissiisarfimmiittussanngorlugu eqqartuunneqarpoq.
Anngiortumik eqqussuinermi tunuliaqutaasoq Danmarkimi najugaqarsimasoq, allanik arfinilinnik suleqateqarluni piffissami sivisunerusumi hashimik 20 kiilumik Nunatsinnut anngiortumik eqqussuinermik aaqqissuisuusimasoq, politiini unnerluutiginnittoq Lars Kirkegaard ilisimatitsivoq.
- Sukumiisumik misissuinerup ukiup affaa sinnerlugu sivisussuseqartup kinguneranik, inuit katillugit qulingiluat unnerluutigineqarput, taakkunanngalu arfineq marluk katillugit ukiuni 14-ini pineqaatissinneqarsimasunut inissiisarfimmiitussanngortitaasut, politiit ippassaq nalunaarput.
Angut alla Nuummiittoq peqquserluutinik aningaasaliorsimasutut ippassaq aamma unnerluutigineqartoq, politiit ilisimatitsissutigaat. Inuit aningaasanik pappilissanik 1000 koruuninik, suli immaqa ingerlaartuusinnaasunut eqqumaniaqqullugit, politiit kajumissaarutigaat.
Peqquserluutinik aningaasaliorneq sakkortuumik pineqaatissiinermik kinguneqartarpoq, aningaasammi inuiaqatigiinnut pingaaruteqarluinnarmata, kikkunillu tamanit tatigineqarsinnaasariaqarmata, politiinit ilaatigut taama allapput.
