Angummi ilisaanerani toqqutigisaminik nerisoq
Angut 71-inik ukiulik mikiarnerlutanik toqunartunissimasunik nerereernermi kingorna toquvoq. Mitit kivikkat angutip nammineq nammineq piliarisimavai.
Pisumut alianartumut ilaavoq, ilaqutaasut isumaqarmata utoqqartartik utoqqalilluni toqusimasoq, ilisimaneqarsimanngilarlu mitit mikiarsikkat toqqutigigai. Taamaammat 71-inik ukiullip ilisaanerani mitit kivikkat sassaalliutigineqarsimapput.
Ilisinerup kingorna toqusup pania 46-nik ukiulik aamma toquvoq. Taakku saniatigut nunaqqataasut tallimat Dronning Ingrid Peqqissaavianut unitsinneqarput. Pingasut perulupput marlullu nakkutigineqarlutik.
Nunatsinni Inuussutissalerinermik Nakkutilliisoqarfiup pisortaa Asbjørn Brandt
oqaloqatigaarput.
Uloriananngitsunik pilissagaanni, nerisassat peqqissaartumik piliarineqartarnissaat pingaaruteqarmat, taassuma oqaatigaa.
Appaliarsunnik miternilluunnit taamatut pileriaaseqarneq, taassuma nuannaarutigivallaanngilaa taamaalillunimi ulorinaateqarsinnaanerat qaninnerusarmat.
- Pileriaaseq immikkut ittoq atorneqarpianngitsoq pineqarpoq, kisianni taamatut pilineq ulorianaateqanngitsuunngilaq, ajutoortoqassanngippammi ileqqut maleqqissaarlugit suliarineqartariaqarmata, Asbjørn Brandt oqarpoq.
Taassuma ilanngullugu oqaatigaa, isumannaatsumik piliniartarnissaq pillugu innuttaasut paasisitsiniaavigineqartarnissaat Nunatsinni oqartussanit isumaginiarneqartartoq, soorlu ileqqutoqqat naapertorlugit pileriaatsimi ulorianaataasinnaasut paasisitsiniutigalugit, assersuutigalugu mikiarsiisarnerup ulorianaatigisinnaasaannut tunngasut.
Taamaammat taanna inuiaqatigiinnut kalaallinut oqariartuuteqarpoq.
- Pileriaatsimut ulorianaatilimmut taamaattumut mianersoqqusiinnarsinnaavugut, Asbjørn Brandt oqarpoq.
Taamatut toqunartuninnermut ersiutaagajuttut tassaapput, nukillaanganeq nukillaarnerlu, nerinerullu kingorna nalunaaquttap akunnerisa aqqaneq marluk 36-llu qaangiunnerisa akornanni meriarneq pullanneq inalukkanillu unittoorneq quisaqattaarnerlu, ajornerpaaffianilu toqussutaasinnaalluni.
Taamaattumik inuit taama kingunerlutitsillutik eqqugaasorisunut ersarissumik oqariartuuteqarpoq.
- Piaartumik nakorsiartoqartariaqarpoq, suullu nerrisimanerlugit oqaatigalugu, Asbjørn Brandt oqarpoq.
