Angerlarsimaffiup avataanut inissinneqartartut amerlapput
Misissuinermi ersersinneqarpoq nunatsinni aaqqissuussineq pitsaasuusoq, kisiannili meeqqanik angerlarsimaffiup avataanut inissinneqarsimasunik sullissisunut ilinniartitseqittarneq amigaataasoq nalilerneqarpoq.
Kalallit Nunaannilumi meeqqat inuusuttuaqqallu isumaginninnikkut inissisimanerat pillugu oqaluttuat amerlaqaat.
Nalunaarusiamili nutaami "Kalaallit Nunaanni meeqqanut inuusuttuaqqanullu isumaginninnikkut suliniuteqarneq"-mik taaguuteqartumi, nuna tamakkerlugu inuusunnerusunut suliniuteqarneq patajaatsumik ingerlanneqartoq ersersinneqarpoq.
Aningaasanut inatsimmit pisortallu missingersuutaannit aallaavilerluni kiisalu namminneq piumassutsiminnik paasissutissanik tunioraasut atorlugit, meeqqanut inuusuttuaqqanullu iliuusissatut suliniutit 141-t ingerlanneqarsimasut ilisimatusartunit paasineqarpoq. Taakku illoqarfinni annerusuni ilaqutariit ornittagaanniit, ulloq unnuarlu angerlarsimaffinniit kiisalu sunngiffimmi ornittakkaniit imaluunnit aasaanerani aallarsimaarfinniit pissarsiarineqarsimapput.
Nalunarusiami nutaajusumi aammattaaq ersersinneqarpoq, meeqqat inuusuttuaqqallu angerlarsimaffiup avataanut inissinneqarsimasut amerlassusaat nunatsinni qaffasissorujussuusoq, tassa 8 aamma 10 procentit akornanniimmata.
Ilisimatuullumi misissuisimasut, meeqqanik inuusuttuaqqanillu angerlarsimaffiup avataanut inissinneqarsimasunik sullissisuusut tapersersorneqarpallaannginnerat eqqarsarnartoqartikkaat, Ilisimatooq Else Christensen oqarpoq.
- Inunnik meeqqanik inissiisunik, inissinneqarsimasunillu sullissisunut ilinniartitsineq amigaataavoq. Isumaginninnikkut nutaanik suliniutinik aallartitsissagaanni tamanna pingaaruteqartorujussuusoq oqaatigisariaqarpara, Else Christensen nangilluni oqarpoq.
Misissuinerit nutaat Danmarkimi aningaasateqarfimmiit Villumfondimit aningaasalersorneqarput.