Ane Hansen: ICC-mut tapiissutit ikilineri kukkuneruvoq
- Taamaattumik nunarsuarmioqatitsinnik Nunat Issittut aningaasarsiornikkut soqutigineqaleriartornera ilutigalugu maanna pisariaqarpoq, Inuit ICC-tut ittumik kateriffeqarnissaat, tassami suliffeqarfissuit ilaat peqqarniitsorujussuarmik periuseqarlutik aningaasarsiorusuttarput.
Ane Hansen, ICC-p Inuuvimmi Canadamiittumi ataatsimeersuarneranut alaatsinaatsutut peqataasoq, taama oqareerluni aamma eqqaamaqquaa, ICC sutigut tamatigut ilisimasaqartupilussuummat inuiaqatigiit Inuit tamarmik atorluarsinnaasaannik.
AAMMA ATUARUK ICC peqqussutinik 46-nik suliakkiivoq
Soorlu inuit pisinnaatitaaffiisa malinneqarnissaannik, avatangiisit mingutsinneqannginnissaannik, tarnikkut timikkullu peqqissutsikkut ilisimasanik peqarnerisigut, kulturikkut taamatullu meeqqat inuusuttullu inuuniarnermikkut atugarisaasa pitsanngorsarneqarnissaannik suliniuteqarnermikkut.
Tamakkulu tamaasa Nunatsinni politikerinit atorluarneqarsinnaalluartut, Ane Hansenip oqaatigaa.
Nunanit allanit ilisimasat atorluarsinnaapput
-Nunanit allanit ilisimasat taamaattut Nunatta akissaqartinngilaat taamaattunillu katersinissamut nukissaqartoqarani. ICC-li tamakkuninnga ilisimasaqarpoq taakkulu ilisimasaat atorluarsinnaavagut.
Ane Hansenip ilanngullugu oqaatigaa, Naalakkersuisut ICC Kalaallit Nunaannut tapiissutigisartagaasa ikiliartortinneqarneri kukkunerummat allanngortittariaqartorlu, qanga tapiissutisiarineqartartutut ilerlugu.
Naalakkersuisulli siulittaasuata, Aleqa Hammondip eqqaamaqquaa, Kalaallit Nunaata Naalakkersuisui tassaammata, ICC-p allaffissorneranut suliniarneranullu, Issittumi Nunanut allanut sanilliullugu aningaasatigut tapiinerpaasartoq.
Kalaallit Nunaat ICCmut aningaasaliinerpaasarpoq
- Erseqqissaassutigisariaqarpara, Issittumi Nunani allani ICC-kkormiunut sanilliullugu, Nunatta Naalakkersuisuisa ICC Kalaallit Nunaannut aningaasaliissutigisartagaat annerpaajummata.
- Aamma isumaqarpunga Canadami Alasakamilu ICC-qarfiit aningaasassarsiortarnerisa periaasii pitsaalluinnartoq, imminut napatinnermut tunngaveqartoq aamma suleqatissarsiullaqqissuusut, taamaalillutik taakku naalakkersuisuminnik isumalluuteqaannanngitsut.
AAMMA ATUARUK ICC amerlanernik tapiiffigineqassanngilaq
- Neriuppungalu taakku iliuusaat ICC Kalaallit Nunaata siulersuisuunerisa atorluarlugit nukittoqutigiumaaraat, Naalakkersuisut siulittaasuat, Aleqa Hammond taama oqarpoq.
Taassuma ICC Internationalip Inuuvimmi ataatsimeersuarnera tamakkerlugu malinnaavigaa.
