Andreas Uldum: Politikerit innuttaasut sumiginnarpaat
Inatsisartut ataatsimiittarfissanik nutaamik sanaartornissaq millionilikkaanik akeqartussatut nalilerneqartoq, Inatsisartuni ilaasortat tamangajammik - Demokraatit ilaasortitaat marluk kisimik pinnatik akuerereerpaat.
Demokraatit siulittaasuat Andreas Uldum sanaartugassamut annertuumut pingaaruteqanngitsutut taallugu isornartorsiuivoq.
- Aningaasat taakku pitsaanerujussuarmik atorneqarsinnaasut, Demokraatini isumaqarpugut.
AAMMA ATUARUK Inatsisartoqarfik sakkortuumik isornartorsiorneqartoq
- Aningaasat taama amerlatigisut Inatsisartut illorsuassaannut atussallugit kukkuneruvoq, takusinnaagatsigumi meeqqat atuarfiini atuartut atuarfinni nungullarnikuni peqqinnanngitsunillu initalinni atuartinneqartut, aamma kukkuneruvoq politikerit innuttaasunut naleqqiullutik qaffasinnerusumut inisseqqinnerat, Demokraatit siulittaasuat Andreas Uldum oqarpoq.
Nuummi innuttaasut akornanni 1200-t missaat sapaatip-akunnerata naanerani akerliussutsiminnik takutitsinerat, Demokraatit taama allagaqaateqarnerannut tunuliaqutaanngitsoq, Andreas Uldumip erseqqissaatigaa:
- Ukiarli Demokraatini Inatsisartut illorsuassaannut aningaasaliisoqarnissaa naaggaarparput, tassa siunnersuut qaqinneqarmat partiini kisiartaalluta naaggaarpugut, Andreas Uldum oqarpoq.
