Ammartagaq pinerluttulersaarut
2012-mi juullimut ammartagassaq akugissaartussanngorpoq. Tassaassaaq oqaluttuaq juullerpaluttoq asanninnilersaarumik, pinerluttorsiornermi pissanganartumillu imaqartussaq.
Siunnersuutigineqartunik naliliisartut isumaqatigiissut aalajangerput Tumit Productionip siunnersuutaa Aka Hansenimit nassiunneqarsimasoq ajugaatinneqassasoq. Siunnersuutinik nassiussinissamut killigitinneqartoq nallermat siunnersuutit tallimat nassiunneqarsimapput siunnersuullu ataaseq kingusinaarluni tunniunneqarsimalluni.
- Ammartagaq aamma taaneqarsinnaavoq paasiniaalluni juullimut ammartagaq, Nuna Fondenimi siulittaasoq Juliane Henningsen tusagassiutinut nalunaarummini allappoq.
Aappaagu juullimut ammartakkap suliarinissaa Nuna Fondenip aningaasalersorpaa. Nuna Fonden aamma aningaasaliisuuvoq 2010-mi juullimut ammartagaq "Tammartagaq" suliarineqarmat.
- Juullimut ammarkakkamut aningaasaliineq sinerissami meeqqanut allanullu juullimut NunaFondenip tunissutigaa. Naallu KNR-TV-kkut aallakaatinneqartusaagaluartoq imaanngilaq KNR-mut tapiisoqartoq. KNR-TV-kkut aallakaatinneqassaaq KNR-TV tassatuaammaat Nunarput tamakkerlugu ataatsikkut taamatut aallakaatitsisinnaasoq, Juliane Henningsen erseqqissaavoq.
Naliliisartut tassaapput:
Julia Pars
Michael Binzer
Ivalo Egede
Inge Olsvig Brandt
Hans Anthon Lynge
Juliane Henningsen