Aleqa ICC-mit naqqinneqarpoq

ICC Canadamiittoq ICC-mit Kalaallit Nunaanniittumit akisuneruvoq. Naatsorsuinerup tamanna takutippaa, ICC-p siulittaasua tusagassiorfinnut nalunaaruteqarluni taama allappoq.
apriilip 24-at 2014 08:52

Naalakkersuisut siulittaasuata Aleqa Hammondip Qanoruumi apersorneqarluni oqaatigaa, ICC-p Canadamiittup naalagaaffimmit tapiissutisiarisartagai 4 procentiinnaasut. Taamaammat qularutiginnginnerarpaa ICC-p Kalaallit Nunaanniittup 60 procentinik tapiiffigineqartarnera annertuallaartoq.

Naatsorsuinerulli Aqqaluk Lyngep pigisaata takutippaa, ICC-p Canadamiittup aningaasaataata 66 procentii pisortaneersuusut. Taamaammat ICC Canadamiittoq Kalaallit Nunaanniittumut naleqqiullugu akisuneruvoq.

Naatsorsuineruttaaq takutippaa, ICC Kalaallit Nunaanniittoq kattuffimmi nammineerluni aningaasassarsiullaqqinnerpaasoq, naak ICC-p Kalaallit Nunaanniittup tamatumunnga pikkorinnerulernissaanik Aleqa Hammond ujartuigaluartoq.

- Takussutissiatigut uppernarsarneqarpoq, uagut maani Kalaallit Nunaanni akileraartartunut allanut sanilliullugu akisunerunngitsugut. Taamaattumik Naalakkersuisut tunngavilersuutaat eqqortortaqangaanngilaq, isumaqarpugullu pissutsinik piviusunik tunngaveqartumik paasissutissiisalertariaqartut, kattuffiup suujunnaarsinniarneqarnera sipaarniuteqarnikkut angunialersinnagu, Aqqaluk Lynge oqarpoq.

Aammattaaq ICC Kalaallit Nunaanniittoq allaffissornermut aningaasanik soorunami atuisartoq oqaatigaa, NGO-nulli allanut sanilliullugu annertunerunngitsoq.

Naatsorsuinerup ataani takusinnaavat.