Alaskami oqaatsit 20-t akuersissutigineqarnerat persuarsiutigineqarpoq

Alaskami indianerit, Inuppiaat kiisalu Yuppiit Juneau-mi naalakkersuisut allaffeqarfiata silataani inngerlutik, qilaasersorlutik oqalugiartarlutillu sapaatiummalli aallartereerput. Taamaalinerani upernaanerani ataatsimiinnerit naammassinissaannut akunnerit arlaqarunnaarput.

Akerliussutsimik takutitsisut piumasarilluinnagaat tassaavoq, Alaskami nunap inoqqaavisa oqaasiisa assigiinngitsut 20-t, amerikamiut naalagaaffiannit pisortatigut akuerineqarnissaat. Akerliussutsimik takutitsisut oqariartuutaat ersarilluinnarpoq, tassa oqaatsit ilaat tammariartoraluartulluunniit, tamarmik kulturip inuiaallu qanoq issusaannik naqissusiisuunerat.

Akerliussutsimik takutitsisut silamiinnerupput, aammali naalakkersuisunut ilaasortat torsuusani oqaloqatigisarlugit. Aviisimi Alaska Dispatch-imi allaaserisaq naapertorlugu, isummatik tusaatinniarlugit katerisimaartut ataasinngornermi ullaassakkut nal. pingasup tungaanut, siunnersuutip Alaskami kongressimi senatimilu ilaasortanit akuerineqarnissaata tungaanut malunnartitsiniarsimapput.

Oqaatsit 20-t taakkua ilaat tassaapput nagguaqatigiit Inuit makkua oqaasii assigiinngitsut; Inupiaq, Yupiit Siberimiut kiisalu Alaskap timaani Yupiit.

Alaskami oqaatsit tamakkua pisortatigut akuersissuteqarnerat sutigut malunnartinneqassanersoq suli ilisimaneqavissunngilaq, akuerineqarneralli Alaskami nunap inoqqaavinut taakkualu kulturiat eqqarsaatigalugu misigissutsikkut annertuumik pingaaruteqarpoq.