Akileraarutit akitsuutillu sukateriffigineqalerput
Atugarissaarneq pitsaanerulissappat aamma 371 millionit koruuninik nalilimmik kujataani timmisartoqarfiliortoqassappat, piffissami aggersumi Nunatta karsianit aningaasat amerlasuut atorneqassapput.
Aningaasanut inatsisissatut siunnersuut amerlanerussuteqartunit tapersersorneqarpat, akileraarutit akitsuutillu qaffanneqassapput, tamakkulu inuiaqatigiinni inuussutissarsiornerullu iluani malunniutaanngitsoornavianngillat.
Naalakkersuisut aaqqissuusseqqinnikkut nutaatigut ukiumut 100 millionit koruunit tungaannut pissarsiarisassallugit naatsorsuutigaat. Aappaaguli 6 millionit koruunit sinnerlugit pissarsinissartik, Vittus Qujaukitsup siulittuutigaa.
Naalakkersuisut siunnersuutaat tigussaasut tassaapput, siusinaartumik pensionisiaqalersinnaanermik ajornarnerulersitsinissaq, soraarnerussutisiassatut katersat maannatut pensioneqalernermi akileraarutigineqassaarlutik, katersilernermi akileraarutigineqartarnissaat.
Taava Naalakkersuisut aamma siunnersuutigaat, inuit aningaasaliissutiminnit agguagarsiaat nunani allanisulli akileraarusersorneqartalissasut aalisakkallu aalisarneqartut assigiinngitsut tamarmik akitsuusersorneqassallutik, soorlu Islandimi pisartut.
Aningaasanut inatsisissatut siunnersuut Inatsisartut ukiaanerani ataatsimiinneranni pingarnernut ilaassaaq. Naalakkersuisut aappaagu 84 millionit koruuninik amigartooruteqarnissaq siunniuppaat.
