Aatsitassat pillugit aqutsisoqarfik avinneqassaaq
Aatsitassaqarnermut Ikummatissanullu Pisortaqarfiusumit avatangiisinut tunngasunik nalinginnaasunik oqartussaasutut suliarinnittarnerup avissaartillugu Avatangiisinik Aqutsisoqarfimmiilernissaanik, Inuussutissarsiornermut Aatsitassarsiornermullu Naalakkersuisup Ove Karl Berthelsenip siunnersuutaa Inatsisartuni ullumi oqaluuserineqarmat, partiinit tamanit tunngaviusumik isumaqatigiissutigineqarpoq.
Immikkoortortami sulianut tunngasunik immikkut ilisimasaqarnerpaatut oqartussaasoqarfimmi oqartussaasutut suliarinnittarnerup isumannaarnissaa siunnersuummut tunngaviuvoq, taamaattumillu avatangiisinut tunngasunik nalinginnaasumik oqartussaasutut suliarinnittarnerup avissaartillugu Avatangiisinik Aqutsisoqarfimmiilernissaa siunniunneqarluni.
Siunnersuullu Inatsisartuni partiinit tamanit tunngaviusumik isumaqatigineqarpoq:
- Aqutsisoqarfiit marlunngortinneqarnerisigut paatsoorneqarsinnaajunnaassaaq avatangiisinik pinngortitamillu illersuinissaq qanoq pingaartinneqartigisoq taamatullu aamma inuiaqatigiinni ineriartorneq pissasoq ilisimatuussutsikkut ilisimasat piujuaannartitsinissarlu tunngavigalugit, Demokraatit politikkikkut oqaaseqartartuat, Andreas Uldum, siunnersuummut oqaaseqarnerminut atatillugu ilaatigut taama oqarpoq.
Avatangiisit pillugit suliniaqatigiiffiup Avatap siunnersuut tunngaviatigut tapersersorpaa, anguniagaqarpallaannginnertulli aamma nalilerlugu.
Avatap siulittaasua Mikkel Myrup ima oqarpoq.
- Avatangiisit pillugit aqutsisoqarfimmi atorfiit marluk pilersinneqarnissaat siunnersuutigineqarpoq, aningaasallu 1,2 millionit koruunit immikkoortoqarfimmut taassumunnga immikkoortinneqarnissaat siunnersuutigineqarluni. Suliat annertuut piviusunngoratarsinnaasut eqqarsaatigalugit atorfiit marluinnaat pilersinniarneqarenrat aningaasallu taama ikitsigisut immikkoortinniarneqarnerat naammaginanngitsutut nalilerparput, avatangiisit pillugit sulianiaqatigiiffiup Avatap siulittaasua Mikkel Myrup oqarpoq.
Assersuutigaluguli aatsitassarsiornikkut uuliasiornikkullu suliat annertusiartornerat ilutigalugu Avatangiisinik Aqutsisoqarfissap suliassai amerliartorumaarput, taamatullu aamma sulisussat, Inuussutissarsiornermut Aatsitassarsiornermullu naalakkersuisup Ove Karl Berthelsenip oqaatigaa.
- Massakkut suliniutip ingerlanneqarnerani ajornartorsiutitut massakkut nutaatut saqqummiussaa imatut oqaaseqarfigissagukku ima oqaaseqarfigissavara: Kisitsisit uani taasai taakku saniatigut taava suliniutit assigiinngitsut qanoqa annertutigineri aallaavigalugit aningaasanik aatsitassarsiorfinninngaanniit akiliisitsinikkut sulisut amerlisarneqartarput, ileqqorlu taanna uani Avatangiisinut Pisortaqarfimmi ingerlateqqinneqarnissaa naatsorsuutigeqqissaarpara, Inuussutissarsiornermut Aatsitassarsiornermullu Naalakkersuisoq Ove Karl Berthelsen oqarpoq.
Siunnersuut aappassaaneerneqannginnermi Inatsisartut Inuussutissarsiornermut Ataatsimiititaliaanni suliarineqassaaq.
Nunatsinni aatsitassarsiornerit uuliasiornerillu Inatsisartuni aqagu aamma oqaluuserineqartussaapput, tassami suliniutini angisuuni illuliortiternernik sanaartornernillu suliassat pillugit siunnersuut Inatsisartuni aqagu oqaluuserineqartussaavoq.
