Aatsitassat pillugit allagaatinik paasitinneqarsinnaatitaanermut apeqqut Ombudsmandip misissuiffigileraa
Tamatumunnga pissutaavoq Aatsitassanut Naalakkersuisup Jens Erik Kirkegaardip Sermitsiami juulip aqqarnangi oqaatigimmagu allagaatit Aatsitassaqarnermik Aqutsisoqarfiup aamma Aatsitassanut Tunngasuni Avatangiisinik Aqutsisoqarfiup akornanni paarlaateqatigiinneqartut tassaasut nammineq ilumi sulinermi allagaatit, taamalu allagaatinik paasitinneqarsinnaatitaanermi pineqartunut ilaatinneqassanngitsut.
Tassungalu atatillugu Vera Lethip tikkuarpaa allagaatit pineqartut nammineq ilumi sulinermi allagaataappata taamalu allagaatinik paasitinneqarsinnaatitaanermi pineqartunut - aallaavittut - ilaatinneqanngitsoorsinnaappata Aatsitassanik Aqutsisoqarfiup aamma Aatsitassanut Tunngasuni Avatangiisinik Aqutsisoqarfiup oqartussaasutut ataasiunerat tunngaviusoq.
Taamaattoqarneralu ombudsmandip apeqquserpaa.
- Inatsiseqartitsinermik paasinninnerup taassuma eqqortuunera assortorneqarsinnaagunarmat Inuussutissarsiornermut, Aatsitassaqarnermut Suliffeqarnermullu Naalakkersuisoqarfik aatsitassaqarnermut tunngasuni Naalakkersuisoqarfittut susassaqartuusoq suliaq pillugu oqaaseqaateqaqqullugu ullumikkut qinnuigaara, Vera Leth Ombudsmandeqarfiup nittartagaani taama allappoq erseqqissaatigalugulu:
- Paasitinneqarsinnaatitaaneq pillugu malittarisassat eqqortumik atorneqarnerat pillugu ataatsimut apeqqut - minnerunngitsumik aamma aatsitassaqarnermut tunngasuni - pingaaruteqartorujussuummat Inuussutissarsiornermut, Aatsitassaqarnermut Suliffeqarnermullu Naalakkersuisoqarfik qinnuigaara oqaaseqaanni uannut sapinngisamik pilertornerpaamik nassiuteqqullugu.
