Aallaasit paarnaaruttalerlik

Sisimiuni aprilip ulluisa aallaqqaataanni aallaasersortoqarpoq. Sisimiuni aallaasersortoqarnerani illut sisamat eqqorneqarput. Inunnik ajoqusertoqanngilaq aallaasersortullu nukappiaqqat 13-nik 14-nillu ukiullit tigusarineqarput.

Radioaviisip Sisimiuniinnermini illut aallaaneqarsimasut ilaasa inuttaat, aamma Ilinniartitaanermut Kulturimut sunngiffimmullu pisortaq, Henrik Soloy, aallaasersorsimaneq pillugu oqaloqatigaat.

- Isumaqarpunga aallaasersortoqarsimanerup eqqartorneqarnera illuinnaasiorpallaartoq, soorunalimi aallaasersorneq akuerineqarsinnaangilaq, kisianni susoqavissimanersoq eqqarsaatigeqqaarneqartariaqaraluarpoq. Nalunngilarput nukappiaqqat taakku susassaaleqillutik taama isiorsimasut, aamma aallaasit tigoriaannaasimasut, isumaqarsimappullu nuannerunartoq illut aallaasaqattaassallugit. Soorunalimi taamaasiorneq akuersaarneqarsinnanngilaq, annertunerusumilli eqqartussanngilara meeqqat pineqarmata, Henrik Soloy taama oqarpoq.

Taassuma ilanngullugu eqqaavaa aallaasersortoqarnerani inunnik ajoqusertoqarsimanngitsoq. Nukappiaqqallu inunnik ajoquusinissaminnik eqqarsaateqarsimanngitsut.

- Ajoqusiiniarluni eqqarsaateqarluni aallaasersortoqanngilaq, angajoqqaat aamma pineqanngillat. Isumaqarpunga illuinnaasiorluni oqallittoqarpallaartoq, susoqavinnersoq eqqarsaatigeqqaarnagu, Henrik Soloy taama oqarpoq.

Illut aallaaneqarsimasuni najugaqartut ilaat isumaqarpoq, aallaasersorneq pimoorullugu iliuuseqarfigineqartariaqaraluartoq.

- Tupannartorujussuuvoq aamma nuanninngilaq, tassami nuanninngitsorujusuuvoq. Tupannarami, soorlu eqqarsaaterpassuit: Susoqartoruna? Soormitaavaana taamaattoqartoq? Seqqornerit kingorna eqqarsaaterpassuit sorpassuit saqqummerrakkamik, assut tupannarpoq nuanninngitsorujussuuvoq, Gabriel Larsen taama oqarpoq nangillunilu:

- Neriartorlunga ammukarama, una majuartarfikkut, ammut apuutilerlungalu seqqorpallak, matorput eqqoramiuk, immaqa sukkanerulaarsimagaluaruma aallaatissimasinnaagaluarpunga, imaluunniit igalaami misissuininni tappikani qulaani aallaatissimasinnaagaluarpunga. Tupannartorujussuuvoq, Gabriel Larsen taama oqarpoq.

Henrik Soloy-ip eqqaavaa nukappiaqqat aallaasersorsimasut inunnik ajoqusiinissaminnik eqqarsaateqarsimanngitsut, taamaakkaluartoq aallaasersorneq tarnikkut akornusiisimavoq.

- Isumaqarlunga ajunngitsumik qaangerlugu, kisianni pisorpallattoqaraangat qisuariartarpunga tupallunga, naalarnilerlunga. Isumaqaraluarama ajornanga kisianni kinguneqartoq paasivara, annilaanganertaqarpoq, Lone Lange Larsen taama oqarpoq.

Aappariit aallaasersorneq pimmat illup iluaniissimapput, igalaaq matulu aallaammik aallaaneqarsimapput, aappariit taakku isumaqarput, isumannaallisaaneq eqqarsaatigalugu aallaasit paarnaarullugit tigoriaannaajunnaarnissaannik inatsiseqartariaqaraluartoq.

Qeqqata Kommuniata isumannaallisaaneq eqqarsaatigalugu aallaasit paarnaarunneqartalernissaanut siunnersuut isumaqatigaat.