Aalisarneq pillugu isumasioqatigiinnissaq erinitsaatigineqartoq ullumi aallartissaaq

Aalisarnermut, Piniarnermut Nunalerinermullu Naalakkersuisoqarfiup aalisarneq pillugu isumasioqatigiisitsinissaa ilaatigut erinitsaanneqarsimasoq, aalisarnermut, piniarnermut nunalerinermullu naalakkersuisup, Finn Karlsenip, ullaap tungaa qulingiluap qeqqanut pisortatigoortumik ammassavaa.
apriilip 02-at 2014 04:21

 Aalisartut aalisarnermullu attuumassuteqartunik suliaqartut katillutik 140-t missaanniittut isumasioqatigiinnermi peqataassapput. Isumasioqataasussat ilaat aamma tassaapput naalakkersuinermik suliallit atorfilittallu.
 
Aalisarnermut, Piniarnermut Nunalerinermullu Naalakkersuisoqarfiup nalunaarutigaa isumasioqatigiinnermi siunertarineqartoq nunatsinni aalisarnermi unammilligassat suussusersineqarlutillu eqqartorneqarnissaat.
 
Aamma isumasioqatigiinnermi peqataasut aalisarnerup aningaasarsiornikkut, peqassuserlu eqqarsaatigalugit, attanneqarsinnaasumik ingerlanneqartariaqarneranut sinaakkutissanik eqqartueqatigiisinneqassapput.
 
Isumasioqatigiinneq Aalisarnermut, Piniarnermut Nunalerinermullu Naalakkersuisoqarfimmit , KNAPK-mit aamma Kalaallit Nunaanni Sulisitsisut Peqatigiiffiannit suleqatigiilluni aaqqissuunneqarpoq.
 
Aalisarneq pillugu isumasioqatigiinneq Nuummi Hotel Hans Egedep ataatsimiittarfissuani sisamanngorneq 3. apriili ilanngullugu ingerlanneqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq