70.000 koruunit naliginut tillinniarlutillu aserorterisut
Eqalugaarsunni Pilersuisup pisiniarfiani internetikkut attaveqaat iluarsivoq sisamanngornerup ullaassaani tilliarnermi kipitinneqarsimagaluartoq. Nukappiaqqat 14-nik 15-inillu ukiullit tillinniarlutillu attaveqaatinik annertuumik aserortereersut Pilersuisoq sisamanngormat matoqqasariaqarpoq. Pisiniarfilli tallimanngormat nalunaaquttap akunnerini arlaqanngitsuni ammavoq.
- Maanna internetikkut attaveqaqqilerpugut. Pisiniarfik, aningaaserivik allakkerinerlu naliginnaasumik ammaqqilerput, Eqalugaarsunni niuertoq Jakobine Nielsen KNR.gl-mut oqarpoq.
Politiit aamma Eqalugaarsunneereerput aserterinermilu tillinniarnermilu nalilersuillutik.
- Aserorterineq tillinniarnerlu 70.000 koruunit inulaarlugit naleqarpoq. Tillitat aamma tamarluinnangajammik nassaarineqareerput, vicepolitikommisær Bent Ole Kleist oqarpoq.
Tillinniat tamarmik maanna suli Eqalugaarsunniipput. 14-nik ukiulik qanoq pineqassanersoq inunnik isumaginnittoqarfimmit aalajangerneqassaaq. 15-nik ukiullip qanoq pineqarnissaa pillugu inunnik isumaginnittoqarfik siunnersuusiortussaasoq Bent Ole Kleist ilisimatitsivoq.