Disko Line Upernavimmut Uummannamullu angallassisarniarsimagaluarpoq

Uummannamut Upernavimmullu sinersortaammik angallassissagaanni pisortanit taperneqarnissaq pinngitsoorneqarsinnaanngilaq, ornitassat pineqartut ungasissumiimmata, Qeqertarsuup Tunuani umiarsuaatileqatigiit namminersorluni ingerlanneqartup Disko Line-p pisortaanera Ole Dorph taama oqarpoq. Disko Linekkut Ilulissaniit avannamut sinersortaammik angallassilernissartik siunertaralugu Namminersornerullutik Oqartussanut tapiiffigineqartumik qinnuteqaraluarput iluatsitsinatilli. Ole Dorph ima oqarpoq:

-Naalakkersuisunut taamani saaffiginnissutitsinnut akissutigineqarpoq; Inatsisartut ukiut pingasut- sismanat matuma siornagulli aalajangersimanerat, tassa siunissami timmisartumik angallassineq kisimi taperneqartalissasoq, sinersortaatinillu angallanneq tapiiffigineqartarunnaassasoq. Naalakkersuisut akipput uagut pilersaarutigisaraluarput taamaalilluni tapersersorneqarsinnaanngitsoq. Patsisiginiarneqartoq taanna, tusaatissatut tiguarput, naak isumaqatigivissunngikkaluarlutigu.

Ole Dorph oqarpoq Uummannamut Upernavimmullu sinersortaatinik angallassissagaanni taperneqarnissaq pinngitsoorneqarsinnaanngitsoq.

- Sualummik immaqa ukiut siulliit tallimat imalluunnit arfineq-marluk eqqarsaatigalugit.

Ole Dorphip eqqaamaqquaa AUL kisimiilluni angallassisuugallarmat, Ilulissaniit avannamut Upernavik tikillugu angallanneq piviusunngortinneqassappat, Namminersornerullutik Oqartussat qanoq annertutigisumik pilliuteqassanersut.

- Taamani oqaatigineqarpoq ukiumut 45-it imaluunniit 50 million koruunit tapiissutigineqanngippata, aqqut taanna piviusunngortinneqarsinnaanngitsoq.

Disko Linekkormiut isumaqarput ukiut arfineq marluk ingerlaneranni ingerltaisnermut tapiissutit atorunnaarsikkiartuaarneqarsinnaasut.

- Ukioq siulleq 13 million koruunit tapiissutigineqarunik, ukiuni tulliuttuni arfinilinni taapiissutaasartut ikiliartortillugit nul-unngortinneqarsinnaapput. Periuseq taanna atorlugu aaqqissuussigaanni naggataagut tapiissutit peerneqarsinnaagaluarput.

Ole Dorph oqarpoq takornariaqarneq sinersortaateqarnerlu imminnut atalluinnartut, avannaanilu takornariat sinersortaatinut ilaallutik takornariarnissartik orniginerusaraat.

-Qeqertarsuup Tunuani sinersortaatigut takornarianik angallassinermi pinngitsoorneqarsinnaanngillat.

Timmisartukkulluunniit pisariillisaallunilu akikillisaasoqaraluarpat umiarsuit atunngikkaanni, takornariat taava oqassapput ” Qeqertarsuup Tunuaniiginnassaagut”. Taamaattumik Naalakkersuisunut tamanna paaseqqunaraluarpoq; Nuussuup avannaani takornariaqarnikkut piorsaasoqassappat, umiarsuit umiarsuaaqqallu atussallugit pisariaqarluinnarpoq.

Ole Dorph taama oqarpoq. Diskoline Qeqertarsuup Tunuani angallassissutinik tallimanik angallataateqarpoq.