Buship isumaanut naleqqussaasarsimapput

Silaannaap kissatsikkiartornera pillugu amerikamiut ilisimatuut nalunaarusiatik, præsident Buship isumaanut, silaannaap allanngoriartornera pillugu apeqqummut qularutiginnittuartumut, pinngitsaalisaallutik naleqqussartarsimavaat.

USA-mi kongresimi ataatsimiititaliaq ippassaq unnukkut ataatsimeersuarmat tusarniaanermi ilisimatuut suleqatigiit taama nalunaarput.

- Sukumiisumik ilisimatusarnitsinni paasisatta soqutiginartorujussuit nalunaarusiorneqarnerisa ilaat ingerlateqqinneqartarsimanngitsut paasivarput, Ilisimatusartut Qularisallit Kattuffianneersoq, Francesca Grifo, sukumiisumik ilisimatusarnerup siuarsarneqarnissaanik suliniuteqartoq, oqarpoq.

Ilisimatuut suleqatigiit misissuinerini paasineqarpoq, silaannaap allanngoriartorneranik ilisimatusartut 150-it ikinnerpaamik 435-riarlutik politikkikkut inuttut namminertut akuliuffigineqartarsimasut.

- Nalunaarusiatsinni uppernarsaatinut akissuteqartut affangajaat nammineq inuttut imaluunniit pinngitsaalineqarlutik misigisarsimapput ima peqquneqarlutik; oqaatsit ”silaannaap allanngoriartornera” aamma silaannaap kissatsikkiartornera”-nik allassimasut piiaqqullugit, Grifo oqarpoq.

Silaannaq ilumut allanngoriartortoq, tamannalu inunnit pilersitaasoq, præsident George W. Buship tamanut siorna aatsaat nassuerutigaa.