Aleqa Hammondip misissorneqarnissaa Demokraatit piumasaraat

Siumup siulittaasuata Aleqa Hammondip Qinigaasinnaaneq pillugu Ataatsimiititaliami ilaasortaanini tunngavigalugu nipangiussisimasussaatitaanerminik sumiginnaasimasutut, aviisi.gl-mi kiisalu Atuagagdliutini allaaserineqarnera, Demokraatinit qisuariarfigineqarpoq.
Allattoq Louise M. Kleemann
novembarip 13-at 2009 07:54

- Pisuutitsineq sakkortoorujussuuvoq, tamaattumik Demokraatit Inatsisartut Siulittaasoqarfiat qinnuiginiarpaat tusarliunneqartoq paaseqqissaarneqarnissaa tungaanut misissorneqassasoq, Demokraatit tusagassiuutinut nalunaarutaanni taama allaqqavoq.

Inatsisartuni suleriaaseq ukioq kingulleq allanngortinneqarmat, inatsisartuni ilaasortat ulluni 14-ni peersinneqarsinnaalernerat Demokraatit misissuinissamik piumasaqaamminni innersuussutigaat.

- Demokraatini nalilerparput, Qinigaasinnaaneq pillugu Ataatsimiititaliami ilaasortatut nipangiussisimasussaatitaanermut peqqussummik unioqqutitsineq Inatsisartut ileqqorissaarnissamut malittarisassaannik sakkortuumik unioqqutitsinertut taaneqartariaqartoq.Tamanna tunngavigalugu piumasarisariaqarparput, Inatsisartut Siulittaasoqarfiata Aleqa Hammondimut pisuutitsiniutigineqartut misissorlugit allartissagai, Demokraatit allapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq