Misissuinerit takutippaat Nuummi Blok P, annertuumik PCB-taqartoq. Blok P ukiup naanerani isaterneqarpat eqqagassartaasa toqunartortallit isumagineqarnissaat 15 millionit koruunit tungaannut akeqassaaq. Taama Olafur P. Nielsen naliliivoq Namminersorlutik Oqartussani Ineqarnermut, Attaveqarnermut Angallanermullu pisortaqarfimmi pisortaq.
Blok P-mi taamungaannaq tigooraalluni misissuinermi, toqunartoq PCB inissiarsuarmi inissisimaffinni assigiinngitsuniittoq siumorneqarpoq.
- Qaavani qalipaammi, ussissaammilu gummiusumi PCB-qartoq misissuinerit takutippaat.
Misissuinerit ilaanni annikitsumik ilaannilu annertuumik akuutissanik ulorianartutut taaneqartartunik nassaartoqarpoq. Taamaammat isaterneqarpat eqqagassartai annertunerit eqqagassatut ulorianartutut immikkut ittumik isumagineqarnissaat qularnanngilaq, Ineqarnermut, Attaveqarnermut Angallannermullu Naalakkersuisoqarfimmi pisortaq, Olafur P. Nielsen taama oqarpoq.
Siunnersuisarfiup Inuplanip massakkut inissiap ilamerngi assigiinngitsut sukumiinerusumik misissortussanngorpai. Taassumalu kingorna nalunaarusiussapput, taannalu najoqqutaralugu avatangiisinut pisortaqarfiup eqqagassat ulorianartut qanoq pineqassanersut aalajangissavai.
Danmarkimi kommunekemimut nassiullugit isumagitikkiartornissaat ilimanaateqarluarpoq. 2009-mi blok Q-p isaternerani eqqagassat PCB-ertallik taamaalineqarput. Taamaanilu taamaaliorneq akikitsuinnaasimanngilaq; 3, 5 millionit missiliorlugit akeqarami.
Blok P-llu isaternerani eqqagassat ulorianartut kommune kemimut nassiunneqarnissaat 3,5 millionit koruunit sisamariaataanik akeqassangatinneqarpoq.
- Blok P-p sanaartorneqarnerani atugaasut blok Q-mut assinguppata, eqqagassartai ulorianartortallit immikkut ittumik isumagineqarnissaat 12 aamma 15 millionit koruunit missaannik akeqassaaq. Taassumallu qaavatigut isaterneqarneranut aningaasartuutissat ilanngukkumaarput, Olafur P. Nielsen naliliivoq.
Massakkorpiaq Kalaallit Nunaanni eqqagassanik toqunartortalinnik immikkut ittumik isumaginninnissamut periarfissaqanngilaq, nunallu iluanut toqqortiinnarneqarnissaat piumasarineqarnani. Taamaammat qanoq iliortoqarsinnaanera misissuiffigineqalaalereersoq, Olafur P. Nielsenip oqaatigaa.
- PCB qalipaataaniittoq betonitaanut ingerlasimavoq, 2-3 centimeterisullu itissusilimmik betonimut pulasimassappat, betonip PCB-ninnikortaa qapiussuarmik piiarneqarsinnaassanersoq misissorneqassaaq. Taamaaliortoqarsinnaasuuppat eqqagassat ulorianartortallit atlantiku ikaarlugu immikkut isumagineqarnissaat angallanneqarnissaallu annikinnerujussuanngussaaq. Tamannalu eqeersimaarfigilluinnarparput illoqarfiit arlallit assingusunik blokkeqarmata. Inuiaqatigiinnummi akisoorujussuanngussaaq blokkit taamaattut isaterneqareeraangamik tamarmik Danmarkimi kommunekemimut immikkut ittumik isumagitinneqartassappata. Blok P-mi taamungaannaq tigooraalluni misissuinermi, inissiarsuaq aamma asbesteqartoq paasinarsivoq, Olafur P. Nielsen oqarpoq.
Ilanngullugu oqaatigaa inissiat iluannik misissuinerit ersersissikkaat ineqartut PCB-mik sunnerneqarsimanissaat ilimanaateqanngitsoq, PCB nassaarineqartoq inissiarsuup silataaniimmat.
