Tunumiut oqaluttuaatitoqaat

Uani quppernermi tusarnaarlugillu atuarsinnaavatit tunumiut oqaluttuatoqaataasa ilai kitaamiusut nutserlugit aallakaatitassiarineqartut.
Tunumiut oqaasiinik soqutiginnittunut atuagassiaqqissunik tunumiusut kitaamiusullu allagaapput, tunumiusuua paasinngikkaanni kitaamiusuuatigut paasineqarsinnaallutik.

Kitaamiusuunngortitsillunilu titartaasoq Lotte Maré Holm
Oqaluttuami Tunersuit Tunissutaani titartakkat ataaniittut titartagartaliussaapput, sinnerili titartagartaqaratik.

show/hide all

Tatta: Pouline Olsen-ip oqaluttuartippaa Isajas Kuitse.
(1985-mi aallakaatitassiaq)
Nakungasuatsiaq: Kalaallit Nunaata radioata toqqorsivianit immiussaasumit Esajas Kuuitsip 1985-imi Pouline Olsen-mut oqaluttuaa Nakungasuatsiaq kitaamiusut nutserlugu Lotte Holm-ip atuffassissutigissavaa.
Tunersuit Tunissutaat: Tunersuit tunissutaat tunumiut oqaluttuaatitoqaat 1981-imi Henriette Rasmussenip aallakaatitassiaanit kitaamiusuunngortillugu aallakaatitassiaq.
Oqaluttuatoqqamik oqaluttuartuuvoq Pauline Nathanielsen, Sermiligaaq.

Tunersuit Tunissutaat

(atuagassiaaraq toorlugu allisillugu isiginnaaruk)

Titartagaq 1: Inoqutigiiaarsuinngooq, nunaqqatigiit amerlasoorsuit, akornanniippunngooq qitornaqanngitsut utoqqaat nuliariit, qitornaqannginnamik pilersorteqanngitsut. Nunaqqaterpassuigooq aallakaalillaraangata, taakku utoqqannguit nuliariit kiserngoruttarput. Uiagooq ateqarluni Milaalinnaamik (Mitaatinnaaq imalt. Mittatinnaaq).

Titartagaq 2: Unnummat tupertik orloramikku, umiaminnut issorarsinnarlugu tassa aallarput. Ikersuaq, ikersuaq ikaarpaat. Uikassaa anguartoq nulia iputtoq. Ukulumi utoqqaat, pillutik pillutik ikersuaq ikaarlugu, tappavunga ilatik qimallugit nunassipput.

Titartagaq 3: Nunassikkamik tappavani uikassaa aallartaraaq nuliani tarrissanagu aanngassanagu, avatinnguani piniartarluni. Tassami nuliakassani isumaalugaa tupermi kisimiimmat. Taamaalluniaasiit piniariartilluni timmut qiviartarluni, qiviaqqileriallarami taappikuuna toqqup qulaaniit nuisoq inussuaq angisoorsuaq, aatsaat taamak angitigaaq.

Titartagaq 4: Aterpoq, aterpoq, aterpoq Mitaatinnaallu nuliani isumaaluginermut atertorsuaq isigiinnalerpaa. Tassunga tupiannut tupeeqqamut aarimmi inussuaq morsoratarpoq. Morsummat taava Mitaatinnaaq annilaangalerpoq, nuliakassani isumaginermut.

Titartagaq 5: Sunaaffa Mitaatinnaap nulia Tunersuup pigaa; - itiinnarlunigooq sukatertarniarli. Tassa itiinnarlunigooq qilertilertarniarli.

Titartagaq 6: Perianngitsoq Mitaatinnaakkut ernersuatik piniartigilerpaat, tassagooq taamak Tunersuit alliartortigaat. Erneri pingasunngorput. Asulugooq angorsornermut, uffamassa ataatakasiat susaarajut-tuusoq. Mitaatinnaakkut ernersuisa piniutilermassuk soorlumigooq tupiat pullakkiartulersoq, mannalumi tupiaraagaluaq, kiisa tupersuanngorpaat.

Titartagaq 7: Mitaatinnaap qitornani nuannaarutigeqigamigit, innarluni ittuppallattaraangat, toqqup ammasuatigut itsuarluni pilertarai, ernersuani ujaqqamik arsartut.

Titartagaq 8: Tassalu ernersuisa nangartornagu pileritsakkamik, mannalu umiaat kusanaq, tassami ernersuisa piniagaannik pigissaalernikuugamik. Tupertik orlorsinnarlugu Mitaatinnaakkut aallaramik ernerminnik iputtigissaaqalutik, ataatakasiat aquppoq. Soorunalimiaasiit anaanakassaat minitaasimanngilaq, ilami siuttuuvoq!

Titartagaq 9: Taakkulu nunaqqatigisimasaat umiamik takunnilerlutik pilerput; - umiarujussuugunartunuku! Aggerput, aggerput, aggerput nunaqqatigisimasaasalu maluginialerpaat umiap inui qaqortuinnangajannik atisaqartut, angeqalutillu. Taava suaartalerpaat: - Kikkuuisi? Kikkuusi? Kikkuuisi?

Titartagaq 10: Umiaq aggerpoq, aggerpoq nunaqqatigisimasaalu apersorput: - Kikkuuisi? Kikkuuisi? Taamaalisorlugooq Mitaatinnaaq sukareerluni timmuinnaq suaarpoq: - Mitaatinnaajuvunga, Mitaatinnaajuvunga! (Nalunagu ajukkuttussaanani).