 |
 |
|
 |
'Oqaatsit' toqqorsiviat 2007
KNR Radiomit Oqaasileriffiup oqaatsit pillugit aallakaatittagaat.
Maani 2007-imi aallakaatinneqartut tusarnaarsinnaavatit:
16.12.2007
Natsillak aamma naggueqatitta puisinut taaguutaat tuvaamiutaq qanoq nassuiarneqarsinnaappat? Oqaaseq kalaaleq qanoq isumaqarpa? Tuluttuumiit kalaallisuumut ordbogeqarpa?
09.12.2007
Ateq Qulutaq qanoq isumaqarpa? Isumarisinnaasaanut siunnersuutit pingasut.
30.09.2007
Kukkuniiaat version 2-p saqqummersinnissaanut atatillugu kalaallisullu parseriliornissap kalaallisuumiillu inuktituumut inupiatuumullu nutserutissap suliarineqarnissaanut pilersaarutit pillugit ilisimatuut suleqataasut apersorneqarnerat.
Aallakaatitassiortoq Nuka Møller
23.09.2007
Oqaasileriffimmi sulisut Sverigemi Danmarkimilu oqaatsit pillugit suliaminnut tungatillugu angalasimanerat pillugu oqaloqatigineqartut.
16.09.2007
Ullorissat taaguutaannut tunngasut aamma uiguutit isummamikkut assigiikkaluarlutik nipaasa assigiinngissinnaasarnerannut tunngasoq.
Aallakaatitassiortoq Lisathe Møller Kruse
09.09.2007
Nunat aqqinut tunngasoq, aternut kittoraatilinnut tunngasoq, aamma taaguummut vejlederimut tunngasoq.
Aallakaatitassiortoq Lisathe Møller Kruse
02.09.2007
Apeqqut iterfilummut tunngasoq, apeqqut Augustimut tunngasoq, apeqqut KNR-imut tunngasoq, kiisalu apeqqutit qallunaat taaguutaannut simpel flertalimut kvalificeret flertalimullu tunngasut.
Aallakaatitassiortoq Lisathe Møller Kruse
26.08.2007
Isikkatta inuai qanoq taaguuteqarpat? Nunap aqqa ‘Navissaat’.
Isumaanut tunngatillugu Oqaasiliortuni ilaasortat oqallinnerat.
Aallakaatitassiortoq Nuka Møller
19.08.2007
Atuakkap Kalaallit aqqisa nalunaarsorsimaffiata saqqummernerani aaqqissuisuusup Oqaasileriffimmi atorfillip Nuka Møllerip apersorneqarnera.
Aallakaatitassiortoq Lisathe Møller Kruse
12.08.2007
Naggueqatigiit Saamit kalaallisut qanoq taaguuteqarpat? Nunap aqqa ‘Navissaat’ qanoq isumaqarpa? Kalaallit oqaasii oqaatsinut eqqarleriinnut sorlernut atasuuppat? Ulloriarsiornermik ilinniusiornermi kalaallisut taaguutissanik Oqaasiliortunut noqqaassutit.
Aallakaatitassiortoq Nuka Møller
05.08.2007
Pinngortitaq, akikillilerut, iffittorsuit, aamma ITCIP.
Aallakaatitassiortoq Lisathe Møller Kruse
17.06.2007
Umimmaat Nunaanni – Ellesmere Islandimi Nunavumiittumi nunat aqqi Kalaallit Nunatsinnut attuumassutillit. Oqaaseq 'qaarlumisuppoq' qanoq isumaqarpa? 'Æresdrab' kalaallisut qanoq taaguuteqassava? Qallunaat atiinik kalaalerpaluttunngorsarlugit allatanik kuisitsisoqarsinnaava?
Aallakaatitassiortoq Nuka Møller
10.06.2007
Apeqqut ”taamaattusisimassaanga”-mut tunngasoq. Apeqqutit qallunaat oqaasiisa ataasiakkaat kalaallisut qanoq taaguuteqarnerinik imallit Oqaasiliortunit akissuteqarfigineqarneri.
Aallakaatitassiortoq Lisathe Møller Kruse
03.06.2007
Oqaaseq 'asasara' aamma 'qivitsisoq' kiisalu aningaasat annertuut imal. amerlasuut nassuiaataat.
Aallakaatitassiortoq Nuka Møller
27.05.2007
Apeqqut uiguummut pajuk-mut tunngasoq, akissutaalu. Apeqqut eqqunngitsumik oqaatsit atorneqartartut uparuartorneqartannginnerinut tunngasoq, akissutaalu. Apeqqut oqaasersiat allanneqartarnerannut tunngasuusoq, akissutaalu.
Aallakaatitassiortoq Lisathe Møller Kruse
20.05.2007
Sooq ernigamik, paneramik aneramillu oqartoqartarpa? Apeqqut kukkuniiaammut tunngasoq, akissutaalu. Tusagassiutinut nalunaarut.
Aallakaatitassiortoq Lisathe Møller Kruse
13.05.2007
Oqaasileriffiup atuakkat saqqummersitassai marluk. 'Avatangiisilerinermi taaguusersuutit - Miljøteknisk terminologi' aamma 'Kalaallit aqqisa nalunaarsorneqarfiat - Fortegnelse over grønlandske navne'.
Aallakaatitassiortoq Nuka Møller
06.05.2007
Ulussaaq aamma ulussaarsuaq. Atit pingasut: Ululinánguak, Imiina Pualunalu. Apeqqut tussiarfissuaq-mut tunngasoq akissutaalu.
Aallakaatitassiortoq Lisathe Møller Kruse
22.04.2007
Atit Inuuteq, Malik, Maligiaq, Ujarneq aamma Sequssuna taakkulu isumaat. Uiguutit –tigu aammalu –tigut paarlaallugit atorneqartalerneri.
"Sussa uanga ilaallunga" imalt. "sussa ilaananga" sorleq eqqorpa?
Aallakaatitassiortoq Nuka Møller.
15.04.2007
Oqaaseq 'qivittoq'. Kalaallisut naggueqatittalu akornanni qanoq paasineqartarnera nassuiarneqartarneralu.
Aallakaatitassiortoq Nuka Møller
01.04.2007
Kalaallit atii qaamanermut attuumassutillit. Oqaaseq 'muluvoq' sumit aallaaveqarpa?
Aallakaatitassiortoq Nuka Møller
25.03.2007
Apeqqut lykkepillerimut tunngasoq, akissutaalu. Apeqqut oqaatsimut alisunnermut tunngassuteqartoq, akissutaalu takkajaaq.
Aallakaatitassiortoq Lisathe Møller Kruse
18.03.2007
Ateq Aviaaja qanoq isumaqarpa? 'Det internationale polarår' kalaallisut qanoq taaneqassava?
Aallakaatitassiortoq Nuka Møller
11.03.2007
Apeqqut silarsuarmut tunngasoq. Nunap aqqinut nunap assinginiittunut tunngasoq. Mål og mælemut tunngasoq.
Aallakaatitassiortoq Lisathe M. Kruse
04.03.2007
Oqaaseq qimmiutillit. Sumiorpalussuseq aallaavigalugu allanniaraanni tamanna akuerisaava? Oqaatsit naaneqanngitsut paasineqarsinnaasulli atugaajartornerat. Ateq Johannesigne.
Aallakaatitassiortoq Nuka Møller
25.02.2007
Vagtberedskab qanoq kalaallisut taaneqartarneranik apeqqut, akissutaalu. Isiginnaarutikkut radiokkullu kalaallit oqaasiisa atorneqarnissaat pillugu inatsisitigut piumasaqaateqartoqannginnersoq apeqqut, akissutaalu. Immakanneq-mut tunngasoq. Oqaaseq arlaliulluta, tassungalu assingut apeqqutigineqarsimasut.
Aallakaatitassiortoq Lisathe Møller Kruse
18.02.2007
Malinnguaq atitut akuerineqarsinnaanersoq pillugu apeqqut akissutaalu. Kalaallit oqaasiisa ullumikkut inissisimanerata suup nalaaniinnersoq erseqqissaatiginera. Nunat tamalaat akornanni Ilitsoqqussaralugu Oqaatsit Ulluat malunnartinniarlugu Oqaasileriffiup aaqqissugaanik Katuap inersuaaraani sutitsissanersoq paasissutissiissutiginera.
Aallakaatitassiortoq Lisathe Møller Kruse
11.02.2007
Ilinniusiorfiup Oqaasileriffiullu suleqatigiillutik ordbogiliornerat pillugu Ilinniusiorfimmi aaqqissuisuusup, ittuugallartullu Abia Abelsenip apersorneqarnera.
Aallakaatitassiortoq Lisathe Møller Kruse
04.02.2007
Ateq Appaleq qanoq isumaqarpa? Oqaasiliortut januarip aqqaneq aappaani ataatsimiinnerannit oqaatsit aalajangikkat.
Aallakaatitassiortoq Nuka Møller
28.01.2007
Sooq oqartarpugut ima: nerivoq oqarsinnaanatalu: neripoq?
Atit nagguissiorlugillu isumaannik paasiniaasarnermi aporfiusartut apeqqutillu. Sequssunap isumarisinnaasaanut siunnersuut.
Aallakaatitassiortoq Nuka Møller
21.01.2007
Sooq oqartarpugut kaffisortarpunga aamma saftitortarpunga, paarlattuanillu oqassanata kaffitortarpunga aamma saftisortarpunga? - Ateq Sequssuna qanoq isumaqarpa? - Oqaaseq ‘qilasarneq’ pillugu ersarissaassut - Tunumiusut ullorissat qanoq taaguuteqarpat? - Danskit oqaatsitik pillugit inatsiseqalissanersoq oqallittussanngulernerat.
Aallakaatitassiortoq Nuka Møller
14.01.2007
www-p taaguutitut tunuliaqutaa. Inuktitut taaguutaa: 'Ikiaqqivik' taassumalu nagguissiornera. Ullorissat 'Cassiopeia' aamma 'Cephes' kalaallisut taaguuteqarpat?
Aallakaatitassiortoq Nuka Møller
07.01.2007
'Veersuit pingasut' pillugit naammagittaalliuut. Meeqqamik atsiisarnermi qanoq amerlatigisunik atsiisoqarsinnaava? Oqaaseq 'periuseq' imalt. 'periaaseq'. Oqaaseq 'psykisk syge'-p kalaallisut taaguutissavia. Aallakaatitassiortoq Nuka Møller
Aallakaatittakkat qulequtaat imaallu
(nutaanerit siulliupput):
