 |
 |
< Nutaarsiassat tamaasa (knr.gl/nutaarsiassat)
|
Ilinniagaqarniartorpassuit ulluni makkunani akissutisissapput Tallimanngorneq juulip 30-at 2010 nal. 13:21 Qallunaat Nunaanni ilinniarniarlutik qinnuteqartorpassuit inuusuttut 52.000-it ullumikkut paasissavaat ilinniarfiginiakkaminnut tigusaasimanerlutik.  Inuusuttut ilinniarfissanut assigiinngitsunik sivisussusilinnut ilinnialerusullutik qinnuteqartut aviisi Berlingske Tidende malillugu aatsaat taama amerlatigaat. Siornamut sanilliullugu qinnuteqarsimasunit qaffariaat 12 procentiuvoq, kisitsisinngorlugu ilinniarfissaminnut tigusaasut 6000-inik qaffariarsimallutik. - Taamaattoqarsinnaaneralu pissuteqarsimassaaq inuusuttut eqqarsarluaqqaarlutik ilinniagassaminnik toqqaasimanerat. Universitetit kattuffianni siulittaasoq Syddansk universitetimilu rektori Jens Oddershed nassuiaavoq. Maluginiagassatullu tikkuarpaa inuusuttut ilinniarusutanut aaliangersimasunut, illoqarfinnilu aaliangersimasuni ilinniarfissanut, pinnatik siammasissumik qinnuteqarsimasut. Immikkuullarissutullu aamma tikkuarpaa pinngortitamik ilisimatusarnerit ilinniarfigissallugit piumaneqarnerat qaffariaateqarsimasoq. Københavns Universitetimi pinngortitamik ilisimatusarnermut qinnuteqartut ukiup siulianut naleqqiullugu 20 procentimik qaffariarsimapput, naak 2009-mi qinnuteqartut aatsaat taamak amerlatigisimagaluartut aamma taanna qaangerneqarpoq. Ritzau malillugu ukioq manna ilinniarfigissallugit pilerigineqarnerpaat tassaapput nakorsanngorniarneq, tusagassiortunngorniarneq kiisalu nunat tamalaat niuernerat pillugu ilisimatusarneq. Nunatsinniit qassit Danmarkimi ilinniarnissaminnut tigusaasimanersut suli paasinngilarput. |
Nutaarsiassaqartitsivik allaffigiuk
Immersugassaq una atorlugu KNR-imi Nutaarsiassaqartitsivik allaffigineqarsinnaavoq.
(Imaluunniit e-mail atorlugu: news @ knr.gl )
