Eqqumiitsuliortut Sisimiuni saqqummersitsipput

AF:  Elisa Isaksen
de in

Assilialiat, eqqumiitsuliat, sanalukkallu Kangaamiuneersut Sisimiormiut qimerloorsinnaanngorpaat.

Tassami Kangaamiuni eqqumiitsuliortut peqatigiiffiat, Art and Craft "Tupilak Kangaamiut", Sisimiuni kulturikkut illorsuarmi Taseralimmi tallimanngorpat arfininngorpallu juulip 23-anni 24-annilu saqqummersitsiutigalutik tuniniaaniarput.

Nunaqarfik Kangaamiut Maniitsup eqqaaniittoq kulturikkut ineriartorfiulluartutut ilisimaneqarpoq, niperujoorutit, eqqumiitsuliortut, sanaluttartut assassortartullu tusaamasaassutigalugit.

Saqqummersinneqartussat tassaapput ujaqqanik ilusilersukkat, ukkusissamit tupilaliat, qiviulisaliat, tassa timmissat meqquinik assilialiat, umimmaap qiviuinik nuersakkat, kiisalu saanernit tuttullu nassuinit sanalukkat.

Eqqumiitsuliortut ilaat utoqqalinersiuteqartuupput, utoqqalinerminni soqutigisaqarnertik tunngavigalugu eqqumiitsuiliornermik aallutaqalersimasut.

- Eqqumiitsuliortut suliaasa avammut nittarsaanneqarnissaat, eqqumiitsuliortut peqatigiiffiata anguniagaasa ilagaat, taamaattumik Taseralimmi saqqummersitsineq tuniniaanerlu pingaaruteqarput, "Tupilak Kangaamiut"-ni siulittaasoq Elisabeth Petrussen Rosing taama nassuiaavoq.

Tags