Ukraine: Illersornissaqarfitta russit timmisartuat qaartartunik usisartoq eqqorlugulu aserorpaat

Russit timmisartuannik qaartartunik nakkaatitsisartumik eqquisimanertik Ukrainep ullumi nalunaarutigaa.

Ukrainemi sakkutuut naalagaasa ilaata Mykola Olesjtjukip timmisartumik saassussisimanertik attaveqaqatigiittarfikkut Telegramikkut nalunaarutigaa.

Nutaarsiassaqartitsivik Reuters taama allaaserisaqarpoq.

- Timmisartoq qaartartunik usisartoq, ungasissumullu ingerlaarsinnaasoq silaannakkut saassussinermi illersuisartut siullerpaamik eqqorpaat aserorlugulu, sakkutuut naalagaat oqarpoq.

Peqqarniisaarniat Ruslandimeersut timmisartoq taanna atorlugu Ukrainemi illoqarfinnik eqqissisimanartunik saassussisartut taassuma oqaatigaa.

Timmisartup qaartartunik nakkaatitsisartup, Ruslandip kujasissuani nunap immikkoortuani Stavropolimi nakkarsimanera, Ruslandip illersornissamut ministereqarfiata nalunaarutigigaa, russit nutaarsiassaqartitsiviata Interfaxip allaaseraa. Timmisartup inuttai sisamat annassinnaasimasut aamma nalunaarutigineqarpoq.

Stavropolip guvernøriata Vladimir Vladimirovip oqarnera naapertorlugu, timmisartup inuttaasa sisamat akornanni ataaseq amerlanerusulluunniit toqutaapput.

Timmisartup nakkarneranut suna pissutaanersoq, Ruslandip illersornissamut ministereqarfiata nalunaarutiginngilaa, atortutigulli ajornartorsiorsinnaasimaneranik kinguneqartoq oqaatigalugu.

Illoqarfik Stavropol Ruslandip kujasissuaniippoq, Sortehavip Det Kaspiske Havillu akornanniilluni.