Tunualiaqutaasut toqqissisimanngillat: Siumumi naalakkersuisoqatigiinneq oqallissutaasoq
Naalakkersuisoqatigiit politikikkut ingerlatsinerat - ingammik piffisami kingullermi, sinerissami partiit immikkoortortaqarfiini toqqissisimanngissutigineqarpoq.
Aalisarnermut inatsisissaq Kim Kielsenimit saqqummiunneqartoq assersuutitut taaneqarpoq, isumaqatigineqarani tamannalu qinersisoqarnissaanik eqqarsalersitsivoq.
Taama isumaqarpoq Aasianni Siumup immikkoortortaqarfiani siulittaasup tullia Enok Sandgreen.
- Aalisarnermut inatsisissaq akuersaarneqassappat ilungersunartumik inissisimavoq taamaattumik isumaqarpunga qinersinissaq pisaqarpoq, Enok Sandgreen oqarpoq.
Aalisarnermut inatsisissaq pivisunngortinneqarpat Aasiannimi aalisakkanik tunisassiorfiit pingasut matuneqarnerannik kinguneqarsinnaavoq, taamaatumik inatsisissaaq akuerineqartariaqanngitsoq Aasianni Siumup immikkoortortaqarfia taama isumaqarpoq.
Inuuniarnermi atukkat ilungersunartut
Aalisarnermut inatsisissaq umiatsiaararsorlutik aalisartunut ilaqutaannullu annertuumik kinguneqartitsissasoq ilisimatusartut ukioq manna erseqqissaatigaat, inuussutissarsiutertillu annaasinnaagaat ilisimatusartut oqarput.
Nunatta sineriaani innuttaasut inuuniarnerat ilungersunartorujussuanngornikuuvoq, Enok Sandgreen isumaqarpoq.
- Suna tamarmi akisoorujussuanngornikuuvoq. Aningasat naleerunnikuupput, suna tamarmi akisoorujussuanngornikuuvoq, sulisartullu aningaasarsiaat allanngussanatik, sinerissami inuuniarneq ilungersunartorujussuuvoq, immaqa Nuummi ajunngilaq, kisianni sinerissami ammuinnaq ingerlavoq, Enok Sandgreen oqarpoq.
Naak Siumup siulittaasua Erik Jensen siorna decemberip qaammataani oqaraluartoq, nunatsinnni inuuniarnerup ilungersunartorsiornerani iliuusissanik arlalinnik suliaqartoqartoq. Inuuniarnikkullu ikiuussutissat qaqugu tunniunneqarumaarnersut taassuma oqaatigisinnaanagu.
IA Siumullu naalakkersuisoqatiginnissamik isumaqatigissutaani allassimavoq nunatsinni aningaasaqarnikkut naapertuilluartumik ingerlatsineq qulakkeerneqassasoq, kikkut tamarmik ajunngitsorsiassaannut naligiimmik periarfissaqartitsissasut kikkullu tamarmik suliassaqartinneqarnissaannut naalakkersuisoqatigiit peqataassasut.
Maanakkulli taamaattoqanngitsoq, Aasianni Siumut siulittaasuata tullia isumaqarpoq, Naalakkersuisoqatigiimmi sulinerat illuatungaanut ingerlasoq taanna oqarpoq.
Uran oqaluuserineqaqqilerpoq
Naalakkersuisoqatigiit suleqatigiinnerat sumiiffinni allani aamma oqaluuserineqarpoq.
Uummannami Siumup siulittaasua Johannes Mathiassen isumaqarpoq aalisarneq kisiat pingaarnertut inuussutissarsiutigineqarsinnaanngitsoq.
Taamaattumik aatsitassanik aamma aatsitassanik uranitalinnik piiaasinnaanermut innuttaasut taasitinneqarnissaat taassuma piumasaraa, aatsitassarsiorneq isertitaqarfiulluarsinnaammat.
Inatsisartunut qinersinermi 2021-mi uranimik piianissaq oqallisigineqangaatsiarpoq, uranip inerteqqutigineqalernissaa IA-p inatsisartunut qineqqusaarutigimmagu. Tamannalu Siumumit akuerineqartariaqarsimaavoq, Naalakkersuisoqatigiit 2022-mi kingusissukkut pivisunngormata.
Suleqatigiinneq
Sinerissami Siumut immikkoortortaqarfiini uran kisimi oqallisigineqanngilaq. Naalakkersuisoqatigiit suleqatigiinnerat qulaajarneqartariaqartoq arlaqartut taama isumaqarput.
Uummannami Siumup immikkoortortaqarfiani siulitaasoq Johannes Mathiassen isumaqarpoq, naalakkersuisoqatigiit suleqatigiinnerminni sanngiiffitik qulaajassagaat, suleqatigiinnertillu ingerlateqqissagunikku nukiit suut atorniarneqarnersut paasissagaat.
Naalakkersuisoqatigiit suleqatigiinnerat pillugu Siumup Ilulissani Qasigiannguanilu immikkoortortaqarfiini ulluni makkunani ataatsimiinnissaminni oqaluuserisussaavaat
Enok Sandgreenip oqarnera naapertorlugu naalakkersuisoqatigiit suleqatigiinnerat ingerlaannassappat allannguisoqangaatsiartariaqarpoq.
- Aap ullut makku atukkavut ilungersunartorujussuupput aammalu taamatut sivisunerusumik ingerlaannassappata innuttaasut atukkamikkut nakkaqqerujussuartussaallutik, Enok Sandgreen oqarpoq
