IA-p Siumullu nutserisoqartalernissamut atatillugu aalajangigaq naammaginngikkaat

Folketingimi nutserisoqartalernissaa alloriarnerit siulliinnarigaat. Aaja Chemnitz IA-meersoq isumaqarpoq.

Allattoq Teitur Larsen , Karline Platou

septembarip 21-at 2023 13:01

Nutserisoq Najâraq Egede

Folketingimi ilaasortat Kalaallit Nunaat aamma Savalimmiut sinnerlugit qinikkat kalaallisut savalimmiormiormiutullu oqaatsiminnik oqaluttarfimmi maanna oqalussinnaanngussapput.

Folketingip siulittaasoqarfia tusagassiorfinnut taama nalunaarpoq.

Folketingimi ilaasortat oqaaseqarnissamut piffissaat sivitsorneqarpoq, namminneq kalaallisut savalimmiormiutulluunniit oqaatsitik danskisut aamma nutsertassammatigit.

Nutserisoqartarnissaanik immaqaluunniit erseqqinnerusumik oqalutseqalernissaanik apeqqut Siumut sinnerlugu folkertingimi ilaasortap Aki-Matilda Høegh-Damip oqallerinnerit ilaanni folketingip oqaluttarfiani kalaallisut oqaatsini atorlugit saqqummiigami taamaattoqarnissaalu kimigiisissutigalugu.

Nunarput sinnerlugu folketingimi ilaasortat aappaat Inuit Ataqatigiit sinnerlugu qinerneqartoq Aaja Chemnitz nutserinisoqarnissanik periarfissaqalerneq nuannaarutigaa, kisianni aamma naammagivinnagu.

- Piffissaq ungasinnerusoq eqqarsaatigigutsigu, nutserisut immikkut inissaannik sanasoqartariaqassaaq. Siunissamimi, Kalaallit Nunaat sinnerlugu ilaasortaqatitta kalaallisuinnaq saqqummiisarnissaat ilimanarpoq, Aaja Chemnitz KNR-imut oqarpoq.

Aamma atuarukOqaatsigut Folketingimi atorneqartalissasut

Markus E. Olsen, Siumut sinnerlugu ilaasortamut Aki-Matilda Høegh-Damimut sinniisussaasoq, aalajangiussaq naammagerpiarnagu oqarpoq.

- Uagut eqqarsaatigisariaqalerparput taava nammineerluta maloqiusamik ingerlatsineq ilumut imminut akilersinnaanersoq, taassuma paasisinnaakutsoorpara apeqqusiisoqarmat aningaasani. Taava taanna aamma apeqqut nammineq aamma utertittariaqarparput uagut nunatsinni ilumut marloriaammik ingerlatsineq ingerlatiinnassaneripput, KNR-imut oqarpoq.

Oqarnera naapertorlugu folketingimi oqalutseqannginnera, kalaallit folketingimi ilaasortaannut ataqqinnerunngilaq.

- Kalaallit politikerit politikeritut qinigaapput, nuterisutuunngitsoq. Nutserisuuneq (oqaluttaaneq) atorfiuvoq immikkuullarissoq. Danmarkiaa iluamik, Markus E. Olsen oqarpoq.

Ukiumut 200 millioni koruuneqassasoq

Nutserititsinermik Inatsisartuni periusaasoq Folketingimi atorneqassappat tamatuma 200 millionit koruuninik naleqarnissaa juunimi saqqummiunneqarpoq.

Taamaaliornissarlu imminut akilersinnaasoq Aaja Chemnitz isumaqarpoq

200 millioni koruuninimmi naleqarnera pissusissamisoorpa?

- Innarluutillit Folketingimi periarfissinneqarsinnaappata, oqalutsinut nutserisunullu aamma inissaliortoqarsinnaavoq - taamaalillunilu naalagaaffeqatigiinnermi oqaatsit atorneqarsinnaanerat qulakkeerneqarluni, oqarpoq.

Innarluuteqarneq oqaatsinillu atuisinnaannginneq assigiinngitsuunnginnamik?

- Taama isumaqanngilanga, inuiaqatigiit tamakkerlugit sinniisuutitaqartoqassappat qulakkeerinninniarneruvoq. Qinikkat tamanna qulakkiissavaat. Taamaammallu kalaallisut, savalimmiormiutut danskisulluunniit oqalukkusuttut tamarmik assigiimmik isiginiarneqassapput, Aaja Chemnitz oqarpoq.

FOLKETINGIMI ILAASORTANUT ATLANTIKUP AVANNAANEERSUNUT TAAKKULU QINERSISARTUINUT NUTAAMIK AAQQIISSUTEQARNEQ

- Oqaatsigut savalimmiormiullu oqaasii Folketingimi atorneqartalissapput. Folketingimi ilaasortat Atlantikup Avannaaneersut Folketingip oqaluttuarfianiit oqaatsiminnik atuisinnaalissapput aamma nutserneqartussaanerat pillugu oqalugiarnerat sivitsorneqassaaq

- Atlantikup Avannaanmiut Folketingimi partiivisa oqalutseqarnissaat aningaaliiffineqassapput

- Folketingip nittartagaata ilaa kalaallisut savalimmiormiutullu nutserneqartalissaaq. Folketingimi suliat aalajangiinerillu tamatumani pineqarput

- Folketingimi ilaasortanut taassumalu iluani sulisunut Kalaallit Nunaata Savalimmiullu oqaluttuarisaanerat, kulturiat, politikkikkut inissisimanerat oqaasiilu oqaluttuarineqarlutik pikkorissaaatigineqartalissapput

Najoqqutaq: Folketingip siulittaasoqarfiata tusagassiutinut 2023-mi septembarip ulluisa 21-anni nalunaarutaa

Kalaallit Nunaata Savalimmiullu ilaasortaatitaasa sivisunerusumik saqqummiisinnaalernerisa saniatigut, kalaallit savalimmiormiullu nunaminnut tunngasunut atatillugu oqallinnernut peqataaffigisimasaminnik allaaserinnittussaatitaapput.

Folketingimi Kalaallit Nunaat Savalimmiullu ilaasortaatitaat aamma namminneq nutserisoqarsinnaanerannik immikkut aningaasaliisoqarsinnaavoq. Tusagassiorfinnulli nalunaarummi qanoq akeqarnissaa taaneqanngilaq.

Kalaallit Nunaata Savalimmiormiullu oqaluttuarisaanerat pillugu, politikki pillugu aamma oqaatsit pillugit Folketingimi ilaasortat aamma pikkorissartinneqartalissasut tusagassiutinut nalunaarummi atuarneqarsinnaavoq.

Siumup Folketingimi ilaasortaatitaa Aki-Mathilda Høegh-Dam oqaaseqartinniarlugu KNR-imit attavigaarput.