Nioqqutissat masattut Tasiilami innuttaasunut atorneqarsinnaanngitsut

Nierfimmi asuliinnartitsineq, ussataavoq.

Tasiilami nioqqutissat inniminnikkat 250.000 koruunit missaannik naleqartut, illoqarfimmi nillataartitsiviit imassaat asuliinnartinneqartut nerineqarsinnaajunnaarlutik Reykjavikkimi umiarsualivimmiipput.

Palletit katillugit 20-t uanitsunik, qallersuutissanik, immussuarnik, manninnik, naatsiianik kiisalu qerisunik imaqartut Danmarkimit Islandimiillu assartorneqartut kissarpallaarnerat pissutigalugu nerineqarsinnaajunnaarput

Tamanna suliffeqarfiit tallimat nioqqutissanik inniminniisut ilaata, Tasiilami akunnittarfimmik piginnittup, Mike Nicolaisenip oqaatigaa.

Palletit assigiinngitsut 20-t 30-llu akornanni kissassuseqarsimasut taassuma oqaatigaa.

Franskit umiarsuaat takornariartaataasoq, Le Commandant Charcot assartuisuuvoq. Taakku takornarianik angallassinermini sanioqqunnissaminnut Tasiilami innuttaasunut nioqqutissanik ukiup ilaani siulliullutik ukiuni arlalinni assartuisarput.

- Takornariartaat ukioq manna apriilimi pingajussaanik assartuivoq, apriilimilu nioqqutissanik nutaanik pissarsisarnerput immikkuullarissuuvoq, taanna oqarpoq.

Franskit umiarsuaat takornariartaat sikumik aserorterisuummat, sikorsuillu aqqutigisinnaammagit Tasiilap sineriaanut ukiup taamaalinerani angallassigaangami nioqqutissanik aamma assartuisarpoq.

Tamanna umiarsuarmut pilersuisumut, Royal Arctic Linemut sanilliukkaanni taanna aatsaat juunimi tikittarpoq.

Akisussaassuseqanngitsumik isumaginninneq

Franskilli umiarsuaanni ukioq manna amerlasuut asuliinnartinneqarsimapput. Akunnittarfimmillu piginnittup oqarnera naapertorlugu umiarsuarmit Tasiilami innuttaasut nioqqutissanik akikitsunik pissarsinissaat tapersiifferusullugu oqaatigiuartarsimagaluaraat maanna soqutigippalaanngillat.

Mike Nicolaisenilli suliffeqarfinnillu piginnittut allat umiarsuup nioqqutissanik tassungalu aningaasanik piffissamillu atuisimasunik isumaginninnera tupaallaatigaat. Taakku 'akisussaassuseqanngitsumik' aamma 'ataqqinninngitsumik' isumaginnittoqarsimasoq KNR-imut malikkut allappaat.

Aallaqqaataaniit

Umiarsuaq nioqqutissanik nutaanik useqarluni Tasiilamut apriilip 18-iani tikittussaagaluarpoq, sikoqarnerali pissutigalugu umiarsualivimmukarsinnaasimanngilaq. Taamaammat ullut marluk qaangiunnissaanut – tassa apriilip 20-anut – kinguartinneqarpoq – kingornalu apriilip 22-anut aamma kinguartinneqarluni.

Kingullermik umiarsuup apriilip 28-ani tikinnissaa nioqqutissallu ilaajumaartut nalunaarutigineqarpoq, suliffeqarfiit tallimat inniminniisimasut taamaalillutik nioqqutissanik immikkoortitsillutillu atorneqarsinnaanngitsunik eqqaasinnaapput.

Taamali pisoqanngilaq.

Nioqqutissalli Islandimi umiarsualivimmut utertinneqartut Mike Nicolaisen nalunaarfigineqarpoq, tassanilu kiassuseq 30 gradit missaanniittoq, akunnittarfimmi piginnittup oqaatigaa.

- Nioqqutissat suaasatut ipput, ersarissumillu isuguttattumiissimallutillu kissartumiissimapput, Mike Nikolaisen oqarpoq.

Taanna 60.000 koruunit missaannik annaasaqarpoq.

Illoqarfimmut pitsaasuusoq

Aningaasalli tassunga suliami matumani isumaqarnerpaanngillat. Taassuma umiarsuup ingerlaavartumik attaveqarfigineqarsimannginnera uggoraa, taamaalillunimi immininnikkani sunersut ilisimassagaluarpai.

Taassumalu susoqarsimanera Tasiilami innuttaasut pillugit ugguarinerpaavaa.

- Umiarsuaq Tasiilami innuttaasunut nioqqutissanik akikitsunik nutaanik assartuilluni Tasiilami innuttaasunut akikinnerulersitsilluni ajunngitsuliorusukkaluarpoq. Taamaammat ajutoortoqarsimanera uggorpoq, Mike Nicolaisen oqarpoq.

Nioqqutissat nutaat umiarsuarmit akeqanngitsumik assartorneqarnerat pissutigalugu innuttaasunut akikitsuupput. Taamaammat suliffeqarfiit innuttaasunut akikinnerusumik tuniniaasinnaallutik.

Oqaloqatigiinneq suleqatigiilluarnerlu

Umiarsuulli suliffeqarfiillu akornanni attaveqaqatigiittoqarsimanngitsoq, Mike Nicolaisenip oqaatigaa. Mike Nicolaisenilli KNR-imit ataasinngornermi oqaloqatigineqarami umiarsuarmi piujuartitsinermut pisortap suliffeqarfiillu akornanni ataasinngornermi ataatsimiittoqassasoq oqaatigaa.

Ataatsimiinnerullu taassuma kingorna Mike Nicolaisen tupaallassimavoq, umiarsuummi suliffeqarfinnik piginnittut annaasaannik taarsiissuteqarfiginiarlugit akueraa. Tamakkiisumilli taarsiissuteqartoqassanersoq taassuma oqaatigisinnaanngikkallarpaa.

Taassumali pitsaasumik eqqarsarneq pingaarnerusoq oqaatigaa. Taamaammat siunissami taama neqerooruteqartoqaqqippat qujarutigeqqinniarpaa.

Taassumalu umiarsuit Tasiilamut ukiup ingerlanerani talissinnaaleqqinnissaannut nioqqutissanik nutaanik tikisitseqqissinnaalernissaq qilanaaraa.

- Attaveqaqatigiinnermut oqaloqatigiilluarnermullu tunngavoq, matumanilu tamanna ajutoorsimavoq, kisianni pitsaasumik oqaloqatigiiginnarniarpugut, siunissamilu susoqarumaarnera takujumaarparput, Mike Nikolaisen oqarpoq.

KNR-ip suliffeqarfik umiarsuarmik Le Commandant Charcotimik piginnittoq oqaaseqartinniarsaraa.